Ձեր վստահելի աղբյուրը

«Սահմանադրությամբ ամրագրված է, որ ԱԺ նախագահի երեք տեղակալներից մեկը լինելու է ընդդիմադիր: Եթե ընդդիմության տվյալ ներկայացուցիչն իր խմբակցությունը փոխել է և դարձել  իշխանություն, ապա տվյալ տեղը պետք է լրացվի ընդդիմության կողմից»,- Ազգային ժողովի արտահերթ նիստում «ԱԺ կանոնակարգ»  ՀՀ  օրենքի նախագծի քննարկմանն ասաց հիմնական զեկուցող Հովհաննես Սահակյանը՝ պատասխանելով պատգամավոր Թևան Պողոսյանի՝  ԱԺ նախագահի տեղակալների հետ կանչման մեխանիզմի մասին հարցին:

Նա նշեց, որ բոլոր պաշտոնատար անձիք, ովքեր հետ են կանչվում, հետ են  կանչվում այն ձայներով, ինչ ձայներով, որ ընտրվել են:

Պատգամավոր Էդմոն Մարուքյանն ասաց, որ, ըստ այս կանոնակարգ օրենքի նախագծի, հաջորդ խորհրդարանում էլի ռեսուրսների անհամաչափ  բաշխվածություն է լինելու, էլի պատգամավորները զիջելու են իրենց ունեցած աշխատակազմային ռեսուրսներով գործադիր իշխանությանն այն դեպքում, երբ որ ծանրության կենտրոնը պետք է լինի խորհրդարանը:

«Խորհրդարանն այնպիսի կառուցվածք պետք է ունենա, որ պատգամավորներին աջակցի իրենց վրա դրված սահմանադրական լիազորությունները պատշաճորեն իրականացնեն, ռեսուրսների բացակայություն չլինի»,- նշեց Է.Մարուքյանը:  

Հովհաննես Սահակյանն ասաց, որ այս կանոնակարգ օրենքի նախագծում ներկայացված գործիքները բավարար են, որպեսզի իրականացվի խորհրդարանական վերահսկողություն, իրականացնեն  այն գործընթացները, որպեսզի ծանրության կենտրոնը տեղափոխվի  հենց խորհրդարան: Հ. Սահակյանն օրինակ բերեց քննիչ հանձնաժողովի միայն մեկ-երկու գործառույթ:

Պատգամավոր Խոսրով Հարությունյանը հիմնական զեկուցողին դիմեց հարցով՝ հիմնավորել, թե ինչո՞ւ խմբակցությունից դուրս եկող պատգամավորը պետք է շարունակի մնալ ԱԺ պատգամավոր, ո՞րն է դրա հենքը:

Հ. Սահակյանն ասաց, որ Սահամանդրության 98-րդ հոդվածով  սահմանված է ԱԺ պատգամավորների  լիազորությունների դադարումն ու դադարեցումը:

«Խմբակցություններից դուրս գալու խնդիրը փորձել ենք իրացնել հետևյալ սկզբունքներից ելնելով. եթե անցնում ենք խորհրդարանական կառավարման ձևի,  նշում ենք, որ խմբակցությունները ձևավորվում են  ընտություններին մասնակցած կուսակցությունների  և կուսակցությունների դաշինքների միջոցով մանդատներ ստացած պատգամավորներով,  հետևաբար  պետք է լինեն  մեկ խմբակցությունում: Խմբակցություններն ավելի ամուր պահելու համար  փորձել ենք որոշակի գործիքակազմ դնել՝ այն պատգամավորը, որը դուրս է գալիս խմբակցությունից, այդ պատգամավորն չի օգտվելու խմբակցության մեջ գտնվող մյուս պատգամավորների համար վերապահված  իրավունքներից՝ բարեկամական խմբերում, հանձնաժողովներում ընդգրկվել, խմբակցության կողմից հարցապնդում ներկայացնել և այլն»: