Ձեր վստահելի աղբյուրը

«Մենք կունենանք արդյունավետ ժողովրդավարություն միան այն դեպքում, եթե Հայաստանում լինեն մի քանի կուսակցություններ, որոնք կարող են փոխեփոխ ստանձնել երկրի կառավարումը: Պարզ է, որ ժողովրդավարությունը գործում է  միայն այն դեպքում, եթե մրցակցություն կա կուսակցությունների միջև»,- Ազգային ժողովի արտահերթ նիստում «Կուսակցությունների մասին» օրենքում փոփոխություններ և լրացումներ կատարելու մասին օրենքի նախագծի քննարկմանն ասաց  ՀԱԿ խմբակցության ղեկավար Լևոն Զուրաբյանը:

Նրա խոսքով՝ Հայաստանի համար կարևոր է կառավարման որակը, որը մեծապես կախված է ունակ կուսակցությունների առկայությունից:

««Կուսակցության մասին» օրենքը շատ լիբերալ, նորմալ օրենք է, մեծ առաջարկություններ չկան: Բայց ամենակարևոր հարց լուծված չէ, որի լուծմամբ իսկապես հնարավոր է  Հայաստանում զարգացնել կուսակցական համակարգը: Դա կուսակցություների պետական ֆինանսավորման համակարգն է: Զարգացած երկրներում կուսակցությունները ստանում են պետական ֆինանսավորում: Հայաստանում  գոնե այս վիճակում տարեկան 1 միլիարդ դրամ հաստատեք կուսակցությունների ֆինանսավորման համար: Եթե այդ հարցը լուծեք, նշանակում է, որ հիմք եք դնում Հայաստանում իսկապես անկախ կուսակցական համակարգի համար»,- նշեց Լ. Զուրաբյանը:



ՀՀԿ խմբակցության ղեկավար Վահրամ Բաղդասարյանն ասաց, որ այս օրենքով ապահովում են քաղաքական մրցակցություն, պարզապես պետք է քաղաքական ուժերով քաղաքական կամք դրսևորեն, որ կարողանան հոգեբանություն փոխել, որպեսզի կայանա քաղաքական դաշտը:  

«Քաղաքական ուժերը   պետք է  զբաղվեն իրենց հեղինակության բարձրացմամբ: Կարևորն այն է, որ կարողանան կուսակցությունները գոնե այնքան մարդ ունենան, որ գոնե յուրաքանչյուր տեղամասում մեկ վստահված անձ ունենան, հանձնաժողովի անդամներ ունենան: Դա շատ կարևոր է»,- ասաց Վ. Բաղդասարյանը:



Հիմնական զեկուցող արդարադատության նախարար Արփինե Հովհաննիսյանը նշեց, որ Ազգային ժողովում քննարկումների ընթացքում տրված բոլոր  գնահատականները քաղաքական էին: Միաժամանակ նա ասաց. «Ձեր ելույթների միջոցով ցույց տվեցիք այս օրենքի կարևորությունը հանրային կյանքի ոլորտների համար: Ակնալում եմ ձեր դրական վերաբերմունքը  օրենքին, քանի որ գոնե օրենքի վերաբերյալ որևէ բացասական կամ խիստ բացասական ձևակերպումներ չեն եղել: Կարծում եմ՝ օրենքն արժանի է ձեր կողմից կանաչ լույս ստանալուն»:



«Կուսակցությունների մասին» օրենքի նախագիծն  առաջին ընթերցմամբ ընդունվեց՝  99 կողմ, 1 դեմ, 3 ձեռնպահ  ձայների հարաբերակցությամբ:

Քվեարկության դրվեց և առաջին ընթերցմամբ ընդունվեց նաև նախօրեին քննարկված «Մարդու իրավունքների պաշտպանի մասին» և կից ներկայացված օրենքների նախագծերի փաթեթը: