Ձեր վստահելի աղբյուրը

Պատգամավորի խնդիրը խոսելն է՝ ինչո՞ւ է սահմանափակվում պատգամավորի ելույթը: Պատգամավորին ընտրել են, որպեսզի նա արտահայտվի,  ինչո՞ւ եք սեղմում,- Ազգային ժողովի արտահերթ նիստում «ԱԺ կանոնակարգ»  ՀՀ  օրենքի նախագծի քննարկմանը նման հարցադրում արեց պատգամավոր Հրանտ Բագրատյանը:

Հարակից զեկուցող Վահրամ Մկրտչյանը ներկայացրեց նախագծի հեղինակերի փաստարկը, որ՝ տաս րոպեի ընթացքում հաճախ մտքերը կրկնվում են, նիստերը ձգձգվում են, դրա համար առաջարկվել է հինգ րոպե: Նա նշեց, որ պատգամավոր Տիգրան  Ուրիխանյանն առաջարկել է դարձնել յոթ րոպե, հեղինակները կարծես համաձայնվել են:

Հարակից զեկուցող արդարադության նախարար Արփինե Հովհաննիսանը խոսեց օրենքի նախագծի վերաբերյալ կառավարության եզրակացության վերաբերյալ: Նա նշեց, որ կառավարությունը ներկայացրել է եզրակացություն մի փաստաթղթի շուրջ, որը պաշտոնապես ներկայացված է եղել կառավարությանը, բայց այսօր քննարկվող նախագիծը զգալիորեն թոթափել է այն մտահոգությունները, որոնք կառավարություն ուներ իր եզրակացության նախագիծը ներկայացնելիս:

«Կարծում եմ՝ առաջինից երկրորդ ընթերցման ռեժիում նաև այդ մտահոգությունները, որոնցից շատերը նաև բարձրաձայնվել են պատգամավորի կողմից, քննարկման առարկա կդառնան և լրամշակված տարբերակը կներկայացվի խորհրդարանի դատին: Այդ ժամանակ կառավարությունը կներկայացնի իր  վերաբերմունքը վերջնական փաստաթղթի շուրջ»,- ասաց արդարադատության նախարարը: