Ձեր վստահելի աղբյուրը

«Հուլիսյան իրադարձություններին Սարի թաղում տեղի ունեցած դեպքերի հետևանքով այժմ կալանքի տակ գտնվող քաղաքացիների գործով դատական նիստերը միտումնավոր են հետաձգում, երկարացնում են գործընթացը»,- այդ մասին այսօր լրագրողների հետ հանդիպման ժամանակ հայտարարեց իշխանության ներկայացուցչի նկատմամբ բռնություն կատարելու մեղադրանքով կալանքի տակ գտնվող Էդուարդ Զեյթունյանի կինը՝ Լալա Բերնեցյանը:

Հիշեցնենք՝ Սարի թաղում հուլիսի 29-ին տեղի ունեցած դեպքերի վերաբերյալ հարուցված քրեական գործի շրջանակներում 9 քաղաքացի այժմ կալանքի տակ է, քրգործը՝ դատարանում:Նրանք մեղադրվում են ծանր հոդվածով՝ իշխանության նկատմամբ բռնություն գործադրելը:

«Արդեն 6-րդ նիստն է այդ գործով հետաձգվել: Միտումնավոր նիստը նշանակում են ժամը 4-ին, ներկայացվում են միջնորդություններ, լսում է, գնում է մեկ ու կես ժամ մնում է խորհրդակցական սենյակում, վերադառնում, հետաձգում նիստը: Միջնորդություններն էլ մերժում է առանց հիմնավորման», -հայտարարեց կինը, որն ապրում է անչափահաս դստեր հետ, առանց ամուսնու խնամքի:

Ի դեպ, իր ամուսնու գործով Լալան ներգրավել է որպես վկա, հարցաքննվել է, սակայն, իր խոսքով, չի իմացել, որ դա հարցաքննություն է:

Տիկին Լալայի ներկայացմամբ, կալանավորված քաղաքացիներից մեկը՝ Հրայր Իսախանյանը, տուբերկուլյոզով հիվանդ է, վարակակիր է սակայն նրա փաստաբանի միջնորդությունը՝ նրան ազատ արձակելու մասին, դատարանը մերժել է:

«Չեմ հասկանում՝ ինչ է կատարվում, թե՞ քաղաքական պատվեր է, թե... մի ամբողջ թաղամաս զրկված է եղել տրանսպորտից, ջրից, գազից: Բայց այդ օրվա վեճից հետո, հաջորդ օրն արդեն բացվեց փողոցը, տրանսպորտ սկսեց գալ, գազը միացրին: Ու այսօր ոչ մեկ մեզ վնասներ պատճառելու համար պատասխան չի տալիս», -նկատեց կինը:

Նրա խոսքով, ինը քաղաքացու գործով տուժող է ճանաչվել 11 ոստիկան, սակայն նրանք «ոչ մեկն էլ բողոք չունեն»:

Սարի թաղի բնակիչ Հարություն Թորոսյանի եղբայրը՝ Թորոս Թորոսյանը արդարադատության նախարար Արփինե Հովհաննիսյանի ուշադրությունը հրավիրեց այս գործով Էրեբունի և Նուբարաշեն վարչական շրջանների ընդհանուր իրավասության դատարանի դատավոր Աննա Դանիբեկյանի վարքագծին և ասաց. «Միտումնավոր այնպես է անում, որ հետաձգվի այս նիստը ու հետաձգվում է մի ամիս: Եթե գոնե երկու նիստ արվի, կպարզվի՝ վերջիվերջո էդ տղաները մեղավո՞ր են, թե՞ չէ»:

Թորոսյանի խոսքով, այս գործում որպես ապացույց կա մի տեսանյութ, որտեղ երևում է՝ ինչ են պահանջում տղաները և ինչ է հետո կատարվում.

«Սկզբից ոստիկանները քիչ են եղել, ջան-ջիգյարով խոսացել են, հետո ներքևից իրանց ստորաբաժանումներից են եկել ու կռիվը սկսվել ա: Այդ ամբողջը ֆիքսված է տեսանյութով, բայց դրա վրա ուշադրություն չեն դրարձել: Շատ կուզենայի մեր նախարարը կեղծ մեղադրանքով կալանավորված լիներ ու ամիսներ շարունակ սպասեր դատական նիստերին»:

Լրագրողը հետաքրքրվեց, թե կոնկրետ Թորոսի եղբայրը՝ Հարություն Թորոսյանը ինչ արարքի համար է մեղադրվում իշխանության ներկայացուցչի նկատմամբ վտանգավոր բռնություն կատարելու համար, նա պատասխանեց.

«Իմ եղբայրը ընդամենը մեկ քար է շպրտել: Ջահելները ավելի էմոցիոնալ են ու հիմնականում հենց ջահելներն են կալանավորված: Բայց ասեմ՝ ոչ մի ոստիկան վնասվածք չի ստացել»: