Ձեր վստահելի աղբյուրը

2017 թվականի «Ավրորա» մարդասիրական նախաձեռնության միջոցառումները ժամանակհատվածը կընդլայնվի: Այսօր լրագրողների հետ հանդիպմանը այս մասին հայտարարեց «Ավրորա» մարդասիրական նախաձեռնության ղեկավար Արման Ջիլավյանը:

«2017 թվականի միջոցառումները տևելու են ոչ թե երեք-չորս օր, այլ կսկսվեն ապրիլի 24-ին և կավարտվեն մայիսի 28-ին: «Ավրորա» մրցանակաբաշխության հավակնորդների անունները կհայտարարվեն ապրիլի 24-ին, իսկ հավակնորդներից մեկը մայիսի 28-ին Երևանում կճանաչվի 2017 թվականի «Ավրորա» մրցանակի դափնեկիր: Դափնեկրին ու հավակնորդներին կորոշի ընտրող հանձնաժողովը՝ 66 երկրից ներկայացված 558 առաջադրումներից»,-տեղեկացրեց նախաձեռնության ղեկավարը:

Նրա խոսքով՝ ընտրված ամսաթվերում շատ կարևոր սիմվոլիզմ կա, ճանապարհ՝ մահից մինչև կյանք, հուսահատությունից մինչև հույս, սպանվածությունից մինչև հաղթանակ:

Արման Ջիլավյանը մանրամասնեց «Ավրորա» մարդասիրական նախաձեռնության հինգ կարևոր ծրագրերը, որոնք առանձին-առանձին իրենց մեջ նպատակներ ու արդյուքներ ունեն:

«Նախաձեռնության անդրանիկ ծրագիրը 100 LIVES նախագիծն էր, որով փորձեցինք Հայոց ցեղասպանությանն ու ցեղասպանության պատմությանը նայել փրկվածների ու փրկողների տեսակետից: Այս նախագծի իմաստն այն էր, որպեսզի գտնեինք և աշխարհի վեց լեզուներով ներկայացնեինք այն պատմությունները, թե 101 տարի առաջ ով և ինչպես փրկեց հայերին և այդ փրկված հայերն ինչ տվեցին  Հայաստանին, սփյուռքին ու աշխարհին: Մոտ 500 պատմություն ենք գտել, ներկայացրել  աշխահին՝ հայերեն, ռուսերեն, անգլերեն, իսպաներն, գերմաներեն և ֆրանսերեն լեզուներով: Ծրագրի անդրանիկ մասը կարելի է ասել ավարտված է, բայց չեն բացառվում, որ կարող են գտնվել նոր պատմություններ»:

Նախաձեռնության մյուս ծրագիրը «Ավրորա» մրցանակն է, որն անց է կացվելու ամեն տարի: 

Արման Ջիլավյանը նշեց, որ այս տարի ևս լինելու է դափնեկրին տրվող մեկ միլիոն դոլարի դրամաշնորհը, որը միանգամից ուղղում է այլ բարեգործական կազմակերպություններին: Պահպանվելու է նաև այն 100 հազար դոլարը, որն անձամբ ստանում է դափնեկիրն՝ իր աշխատանքը շարունակելու համար:

Նախաձեռնության ծրագրային պրոֆեսիոնալ մասը պատկանում է Aurora Dialogues քննարկումներին, որին մասնակցում են միջազգային մարդասիրական գործիչներ:

«Մյուս կարևորագույն մեծ ծրագիրը երախտագիտության կրթաթոշակներն են, որոնք պետք է շարունակվեն դեռ յոթ տարի: Ծրագրի ընդհանուր արժեքը յոթ միլիոն դոլար է: Այդ կրթաթոշակները տրվում են հայ ժողովրդի անունից՝ ուսանողներին, երիտասարդներին Միջին Արևելքի և  արաբական երկրներից՝ ի շնորհակալություն նրա, որ այդ ժողովուրդներն առաջինն էին, որ օգնության ձեռք մեկնեցին հայերի: Ծրագրին այսօր առավել կարևոր է այդ տարածաշրջանի ժողովրդի համար: Կրթաթոշակներով նրանք կարող են  ուսանել  մեր երկրում՝ Դիլիջանի միջազգային դպրոցում ու Ամերիկյան համալսարանում: Հուսով ենք կրթական հաստատությունների ցուցակը շուտով կընդլայնվի: Այս ծրագրից անպայման կօգտվեն նաև սիրիահայ երիտասարդները»,-ասաց Ջիլավյանը:

Հաջորդը «Ավրորա» մարդասիրական ցուցիչ ծրագիրն է. «Աշխարհում տարբեր ինդեքսներ կան, սակայն դրանց մեջ չկար որևէ հումանիտար ցուցիչ: Մեր առաջին տարվա հետազոտությունները ցույց տվեցին, որ աշխարհն իսկապես լավ չի ընկալում և տեղյակ չէ այսօրվա գլոբալ հումանիտար խնդրիներից: Կարևոր է այս ցուցիչն այն առումով, որ առկա մարդասիրական խնդիրներն ավելի լուրջ են ընկալվեն, դրանք չանհանգստացնեն մարդկանց միայն սեփական մաշկի վրա զգալու ժամանակ»:

Անդրադառնալով նախաձեռնության ֆինանսական կողմին՝ ծրագրերի ղեկավարն ասաց, որ իրենց նախորդ կազմակերպչական տարին փակել են 23 մլն դոլար ծախսով, որի մոտավորապես 70 տոկոսը տրամադրել է Ռուբեն Վարդանյանի ընտանիքը. «Ուզում եմ հայտնել, որ այս նախաձեռնությանն այլ բարերարներ էլ են միացել՝ Սամվել Կարապետյան, Նուբար Աֆեյանը, Վլադիմիր Ավետիսյանին: Մոտ 60 հոգի միացել են ծրագրին և աջակցել են, ով որքան գումարով որ կարող է՝ կլինի տասը թե հարյուր դոլար: Հուսով ենք՝այս նախաձեռնությունը կդառնա համահայկական ու համաշխարհային, և ինչպես շատ լուսաբանումների մեջ էին նշում, այն կդառնա «հայկական Նոբել»:

Լրագրողներն Արման Ջիլավյանից հետաքրքրվեցին՝ թե ապրիլին սպասվող ընտրությունները  որևէ ձևով կարող են անդրադառնալ նախաձեռնության միջոցառումների վրա, որի ի պատասխան նա նշեց. «Ամեն տարի կարող է ինչ-որ մի բան կատարվել, յուրքանչյուրի պարտավորությունն է կատարել իր գործը»:

Հարցին, թե «Ավրորա» մրցանակի ընտրող հանձնաժողովի անդամ, օսկարակիր դերասան Ջորջ Քլունին միջոցառումների շրջանակում կրկին կայցելի արդյոք Հայաստան, նա պատասխանեց, որ Քլունին ուզում է գալ. «Շատ հեշտ է նրա հետ աշխատել: Մեծ հաճույքով, հետաքրքրությամբ Քլունին շրջում էր Հայաստանում, հետաքրքրվում էր մարդկանցով: Հուսով ենք, որ ոչինչ չի խանգարելու նրա գալուն»:

Նախաձեռնության ղեկավարն անդրադարձավ նաև «Սասնա ծռերին» աջակցելու մեջ մեղադրվող «հաց բերող» Արթուր Սարգսյանի՝ ընկերների կողմից մրցանակաբաշխությանը առաջադրվելուն. «Բոլոր առաջադրված անձինք դիտարկվում են և մրցանակի հավակնորդ դառնալը ոչ ոքի մոտ չի բացառվում: Նվիրվածություն, խիզախություն, ազդեցություն. այս երեք չափանիշներն են, որով ընտրվում են հավակնորդներն ու դափնեկիրը»: