Ձեր վստահելի աղբյուրը

Մսի շուկայում սանիտարահիգիենիկ պայմանների ապահովման խնդիրը լուծելի է, եթե պետական մարմնի առջև դրվեն ճիշտ առաջնահերթություններ ու մոտեցումներ: Panorama.am-ի հետ զրույցում նման կարծեք հայտնեց «Իրազեկ և պաշտպանված սպառող» ՀԿ նախագահ Բաբկեն Պիպոյանը:

Սննդամթերքի անվտանգության պետական ծառայության՝ քաղաքացիներին ուղղված հորդորը միայն սանիտարահիգիենիկ պայմաններն ապահովող վաճառակետերից միս գնելու, ինչպես նաև անհայտ ծագման միս չգնելու մասին, զարմացրել է ՀԿ նախագահին: Նրա խոսքով, հորդորել կարող են քաղաքացիները, հասարակական կազմակերպությունները, իսկ պետական մարմիները պետք է ապահովեն դրանց իրականացումը:

«Չի կարելի հորդորել սպառողներին ձեռք բերել այն ապրանքը, որը չկա»,-ասաց Պիպոյանը:

Մինչ մսավաճառների հետ հանդիպելն ու խնդիրները քննարկելը, նախ պետք է հասկանալ, թե ինչպես է այդ միսը հասնում վաճառասեղանին:

«80-90 տոկոսի դեպքում միսը տեղափոխելիս պահանջներն ապահովված չեն: Ի՞նչ անի մսավաճառաը: Սա նշանակում է, մարդիկ աշխատելու հերթականությունն էլ ճիշտ չեն ընտրել կամ չգիտեն»,-կարծիք հայտնեց ՀԿ նախագահը:

Նրա խոսքով, բարձրացվում է սպանդանոցների հարցն այն պարագայում, երբ չկան տվյալներ, թե օրական քանի մորթ է կատարվում հանրապետությունում:

«Սա շատ լուրջ ռիսկեր է պարունակում: Եթե մենք չգիտենք, օրական քանի մորթ է կատարվում Հայաստանում, երբևէ ճշգրիտ հաշվառում չի արվել, եթե չգիտենք սպանդանոցների արտադրական հզորությունները բավականացնում են, որպեսզի ողջ մորթն իրականցվի սպանդանոցներում, նշանակում է, որ մենք գործընթացը տանում ենք դեպի կոռուպցիա: Սպանդանոցները կսկսեն թուղթ վաճառել, այնպես ինչպես տեխզննման պարագայում է: Մեքենան տեխզննում չի անցնում, բայց կտրոն ունի»-հնարավոր հետևանքների մասին բարձրաձայնեց Պիպոյանը:

ՍԱՊԾ ղեկավարի փոփոխությունը ոլորտում բարեփոխումների հույս չի ներշնչում փորձագետին: Ասում է՝ կադրային փոփոխությունները խիստ հիասթափեցնող են:

«Համակարգ անգամ խորհրդականի կարգավիճակով ներգրավում են ոչ մասնագետների: Իմ կարծիքով, մենեջերը պետք է խորհրդական բերի մասնագետին: Եթե խորհրդականն էլ մենեջեր է, իրավիճակն այսպես էլ կմնա: Մտահոգիչ է նաև, որ համակարգից քիչ-քիչ հեռանում են նաև մասնագետները»,-ասաց նա: