Ձեր վստահելի աղբյուրը

Հայաստանի կառավարությանն առընթեր Պետական եկամուտների կոմիտեն չի մանրամանսել, թե որ ընկերությունն է փորձել բանան ներկրել Հայաստան և մաքսային ծառայությունում հանդիպել խոչընդոտների:

Panorama.am-ը հարցում էր ուղարկել ՊԵԿ լրատվական ծառայություն՝ փորձելով տեղեկանալ մանրամասներին, հասկանալ, թե հատկապես ինչ խոչընդոտների է հանդիպել  ԵԱՏՄ տարածքից բանան ներկրելու փորձ արած տնտեսավորղը:

Մեր հարցերը հետևյալն են եղել.

Նոյեմբերի 22-ին ՊԵԿ լրատվական ծառայությունը հաղորդագրություն տարածեց, որով տեղեկացվում էր, որ Եվրասիական տնտեսական միության տարածքից, մասնավորապես, Ռուսաստանի Դաշնությունից տնտեսվարողներից մեկը օրերս փորձել է բանան ներկրել Հայաստան, սակայն որոշ խնդիրների է հանդիպել:

Մասնավորապես, ո՞ր 2-րդ ընկերությունն է փորձել բանան ներմուծել Հայաստան:

Դուք նշում եք, թե ներմուծողը խնդիրների է հանդիպել, բայց չեք մանրամասնում, թե մասնավորապես, ի՞նչ խնդիրների մասին է խոսքը: Խնդրում եմ պատասխանեք՝ ի՞նչ լուրջ խնդիրների է հանդիպել բանան ներմուծող ընկերությունը:

Մանրամասնեք, նաև խնդրում եմ, թե ի՞նչ աջակցություն է ցուցաբերվել տնտեսվարողին:

Հասարակության լայն զանգվածների մոտ կա հաստատուն տեսակետ, որի համաձայն, բանան ներմուծել փորձող 2-րդ ընկերությանը խոչընդոտել է այդ շուկայում հաստատուն դիրքեր գրաված «Քեթրին գրուպ» ընկերությունը: Խնդրում եմ, մանրամասնել, արդյոք այս ընկերությունը առնչություն ունի՞ ձեր կողմից մատնանշված խոչընդոտների հետ:

Ներկայացրեք խնդրում եմ տվյալներ, թե ի՞նչ խմբաքանակ է փորձել ներկրել տնտեսվարողը, արդյոք պարզե՞լ եք ներմուծելուց հետո, արդեն շուկայում նա հանդիպել է խոչընդոտների և արդյոք պատրաստվո՞ւմ է նույն գործն անել:

Ի պատասխան ՊԵԿ-ից տեղեկացրել են, որ նոյեմբերի 21-ի տարածած հաղորդագրությամբ իրենք նպատակ են հետապնդել տեղեկացնել հասարակայնությանը, որ ՊԵԿ-ի կողմից գործուն քայլեր են իրականացվում բիզնեսի համար ազատ և արդար մրցակցային միջավայրի ապահովման ուղղությամբ, միաժամանակ խստագույնս նախազգուշացնելով ոչ բարեխիղճ տնտեսվարողներին` զերծ մնալ բիզնեսի բնականոն գործունեությանը խոչընդոտելու մտադրություններից:

«Հաշվի առնելով նմանատիպ դեպքերի հետագայում կրկնության տեսական հնարավորությունը և դրանք կանխելու, համանման փորձերին արագ ու արդյունավետ արձագանքելու անհրաժեշտությունը` ՀՀ ԿԱ ՊԵԿ-ը ձեռնպահ է մնում միջադեպի վերաբերյալ այլ մանրամասներ հրապարակելուց:

Կարևորելով ՊԵԿ-արտաքին տնտեսական գործունեություն իրականացնողներ փոխադարձ վստահության մթնոլորտի ձևավորումն ու ամրապնդումը` կոմիտեն լրացուցիչ տեղեկատվություն չի հրապարակում, հաշվի առնելով նաև այն փաստը, որ նման խնդրանքով դիմել է ներկրողը:

Տվյալ պարագայում ՊԵԿ-ն առավել կարևորում է շուկայում արդար մրցակցության միջավայրի ձևավորումը, ինչի արդեն իսկ տեսանելի առաջին արդյունքներից մեկն էլ բանանի շուկայում վերջին օրերին նկատվող գների շուրջ 200 դրամով անկումն է», -ասված է ՊԵԿ մամուլի ծառայությունից ուղարկված պատասխանում: