Ձեր վստահելի աղբյուրը

Խարկովի «Լոկոմոտիվ» մարզապալատում ավարտվել է ազատ ոճի ըմբշամարտի ակումբային թիմերի աշխարհի գավաթի 3-րդ խաղարկությունը, որտեղ պատվավոր մրցանակը վիճարկում էին 10 երկրի 12 թիմեր: 2-րդ տարին անընդմեջ պատասխանատու այս ստուգատեսում Հայաստանի մարզական պատիվը պաշտպանում էր «Տաշիր» ակումբը:

Հայկական թիմն այս անգամ հանդես եկավ մարզիչներ Հովսեփ Հովսեփյանի և Հաբեթնակ Կուրղինյանի ղեկավարությամբ: «Տաշիրի» կազմում ընդգրվել էին Նարեկ Հովհաննիսյանը (57 կգ), Գարիկ Բարսեղյանը (61 կգ), Նարեկ Սիրունյանը (65 կգ), Վալտեր Մարգարյանը (70 կգ), Սուրեն Խաչատրյանը (74 կգ), Վահե Թամրազյանը (86 կգ), Շամիր Աթյանը (97 կգ) և Անդրանիկ Գալստյանը (125 կգ):

Ինչպես և 2015 թ., այս անգամ ևս «Տաշիրն» իրավունք էր ստացել վիճարկելու ստուգատեսի բրոնզե պարգևները: Ցավոք, հայկական թիմը 2:6 հաշվով պարտվել է ուկրաինական «Զդարովիեին» և զբաղեցրել 4-րդ տեղը: Երկրորդ տարին անընդմեջ «Տաշիրին» չի հաջողվել բրոնզե մեդալ նվաճել:

Գլխավոր մրցանակն ու ոսկե մեդալը եզրափակչում վիճարկել են ամերիկյան «Տիտան Մերկուրին » և իրանական «Ռազին»: Վճռորոշ մրցամարտում 4:3 հաշվով հաղթել է «Տիտան Մերկուրին», որն էլ դարձել է ստուգատեսի հաղթող ու նվաճել պատվավոր մրցանակը` ոսկե մեդալն ու 25 հազար դոլար պարգևավճարը: