Ձեր վստահելի աղբյուրը

Ծաղկաձորցիների շուրջ 35 տոկոսն աշխատում է հյուրանոցային ոլորտում,- այսօր «Արարատ Ռեզորտ» հյուրանոցային համալիրի բացման արարողությունից առաջ լրագրողների հետ զրույցում ասաց Ծաղկաձորի քաղաքապետ  Արթուր Հարությունյանը:

Քաղաքապետը տեղեկացրեց, որ Ծաղկաձորն արդեն ունի 43 հյուրանոց,  «Արարատ Ռեզորտ»-ը այս թվում հինգերորդ հինգ աստղանի հյուրանոցն է: Քաղաքում կա նաև 10 հյուրատուն. «Զբոսաշրջիկների հոսքը 2007-ին կազմում էր մոտ 60-70 հազար, այս տարի այդ թիվը հասել է մինչև 350 հազարի: Հավասարապես ունենք թե տեղացի զբոսաշրջիկներ, թե՝ արտասահմանցի: Հիմնականում գալիս են նախկին խորհրդային միության երկրներից են, սակայն ավելացել է նաև հոսքը եվրոպական երկրներից»:

«Արարատ Ռեզորտ» հյուրանոցային համալիրի տնօրեն Հայկ Բեգլարյանը լրագրողներին հայտնեց, որ հյուրանոցը կառուցվել է ժամանակակից միջազգային ստանդարտներով՝ հաշվի առնելով բոլոր այն ծառայությունները, որոնք կնպաստեն տուրիզմի ակտիվացմանը. «Համալիրում ներդրվել է շուրջ 7,5 մլրդ դրամ, որի արդյունքում ստեղծել ենք120 աշխատատեղ:  Մեր կարգախոսն է «Բարի գալուստ տուն». խոստանում ենք ջանք չխնայել և անել այն ամենը, որ հուրերն իրենց զգան ինչպես տանը: Ունենք 6 կատեգորիաներով 80 համարներ՝ ստանդարտ, դասական, դելյուքս, լյուքս, ընտանեկան և ընտանեկան լյուքս»:

Հյուրանոցի աշխատակիցներից Կարինե Ասատրյանը Panorama.am-ի հետ զրույցում անդրադարձավ աշխատանքի տեղավորման խնդիրներին. «Հնարավորություն է ստեղծվել Հրազդանի և Ծաղկաձորի շրջանի բնակչությանը աշխատանք ձեռք բերելու: Ես Ծաղկաձորից եմ ու շատ ուրախ եմ, որ կարողացա հենց այստեղ էլ աշխատանք ունենալ: Սա նաև ինձ համար զբոսաշրջային, հյուրանոցային ոլորտում կայանալու լավ հնարավորություն է»: