Ձեր վստահելի աղբյուրը

Գյուղացիների վերադարձը Թալիշ կարևոր որոշում կլինի,- «Արցախպրես»-ի թղթակցի հետ զրույցում ասել է Ալաշանում գործող Թալիշի միջնակարգ դպրոցի զինղեկ Ֆեդյա Ապրեսյանը:

«Ալաշանում շարունակում ենք թալիշցի աշակերտների կրթության ու դաստիարակության գործը: Ճիշտ է, երեխաների հիշողությունից դեռ լիովին չի ջնջվել ապրիլյան ագրեսիայի օրերին ապրած վախը, բայց ինձ թվում է՝ այդ ամենը ժամանակավոր բնույթ է կրում, մանավանդ, որ գյուղի վերականգնման ծրագրում մեծ տեղ է տրվում անվտանգության ապահովմանը»,- ասել է Ապրեսյանը և հավելել, որ եթե նախկինում լինեին այդ պայմաններն, այսօր գյուղից հեռու ապրելու խնդիր չէր ծագի:

«Ամեն դեպքում, ինչպես ժողովրդական ասացվածքը կասեր, լավ է ուշ, քան՝ երբեք: Արդեն սկսվել են Թալիշի վերականգնման աշխատանքները: Ըստ նախագծի՝ գալիք տարվա սեպտեմբերի 1-ից մենք կունենանք ավելի հարմարավետ շենքային պայմաններով ժամանակակից դպրոց, նոր ճանապարհներ, նոր տներ, և առհասարակ Թալիշում ամեն ինչ նոր շունչ է ստանալու»,- նշել է թալիշցի ուսուցիչը և ավելացրել, որ, անկախ հանգամանքներից, իրենք չեն պատրաստվում լքել ու անտեր թողնել իրենց հարազատ բնօրրանը:

Դպրոցի կազմակերպիչ Անահիտ Դանիելյանը օր առաջ Թալիշ վերադառնալու աշակերտների երազանքի մասին է պատմել. «Երեխաները շատ են կարոտում, անգամ պատի թերթ են պատրաստել, որտեղ ծննդավայրում կրկին ապրելու իրենց երազանքներն ու ցանկություններն են գրել: Բայց մեր բոլորի մտահոգությունը մեկն է՝ խաղաղություն լինի: Այսօր Ալաշանում ենք հաստատվել, բայց շատ լավ ենք հասկանում, որ եթե պատերազմ եղավ, մեծ տարբերություն չի լինելու, թե որտեղ ենք ապրում, ամեն տեղ էլ վտանգը նույնն է»:

Հարցին, թե ինքն անձամբ պատրաստվո՞ւմ է Թալիշում կրկին ապրել, արդեն երկու անգամ տեղահանման ցավը ապրած Ա. Դանիելյանը նշել է, որ դեռ վերջնական որոշում չի կայացրել, բայց եթե մյուսները գնան, ինքը ևս չի վարանելու:

Թալիշում կրկին վերահաստատվելու մասին հարցին թալիշցի բազմազավակ մայր Լուսինե Բրուզյանը նույնպես դեռ մտավախություններ ունի:

«Ամուսինս Թալիշում է ծառայում, իսկ ես հինգ երեխաներիս հետ ապրում եմ այստեղ: Մեր ընտանիքն ամենավերջինն էր լքել գյուղը, և այժմ էլ պատրաստվում ենք առաջին վերադարձողներից լինել, եթե խոստացված համապատասխան պայմանները լինեն: Մենք մեր ապագան տեսնում ենք հայրենի Թալիշում»,-  ասել է Բրուզյանը:

Աղբյուրը հիշեցնում է, որ հանրապետության իշխանությունները՝ նախագահ Բակո Սահակյանի գլխավորությամբ, որոշում են կայացրել ամբողջովին վերականգնել Թալիշ գյուղը: