«Ժողովրդի ապստամբելու իրավունքի վերաբերյալ» հայտարարության նախագիծը չընդգրկվեց ԱԺ օրակարգ
ԱԺ նախագահ Գալուստ Սահակյանը հերթական քառօրյայի մեկնարկին առաջարկեց ԱԺ 5-րդ գումարման 10-րդ նստաշրջանի օրակարգում մի քանի լրացումներ անել՝ ընդգրկելով մի քանի օրինագծեր, ինչպես նաև որոշ օրինագծերի քննարկումը մինչև մեկ տարով հետաձգել:
Առաջարկվում էր օրակարգ ընդգրկել ԱԺ պատգամավոր Զարուհի Փոստանջյանի հեղինակած «Ժողովրդի ապստամբելու իրավունքը» հայտարարության նախագիծն ու «Լյուստրացիայի մասին» և դրան կից օրենսդրական փաթեթը, որոնք չեն արժանացել ԱԺ պետական-իրավական հարցերի մշտական հանձնաժողովի դրական եզրակացությանը:
Մինչ օրակարգի առաջարկվող փոփոխությունների վերաբերյալ քվեարկության կազմակերպումը, ԱԺ նախագահին հարց ուղղելու համար հերթագրվեց երեք պատգամավոր:
ՀԱԿ-ից Լևոն Զուրաբյանը հիշեցեց, որ 2017-ի ապրիլյան ընտրություններից առաջ սա ԱԺ-ի վերջին լիարժեք նստաշրջանի վերջին քառօրյան է, ԱԺ-ում պետք է քննարկվեին ժողովրդին հուզող ու կենսական հարցեր: Նա հետաքրքրվեց, ինչպե՞ս է ԱԺ ղեկավարությունը որոշում քննակվող հարցերի առաջնահերթությունները:
«Ես չեմ տեսնում որևէ հարց, բացի բյուջեի 2-րդ ընթերցումից, որը էդքան առաջնային ու կարևոր լիներ: Մինչդեռ կան, իսկապես լուրջ հարցեր, որոնք կենսական են»,-ասաց ընդդիմադիր պատգամավորը:
Նա որպես առաջնային հարց նշեց գյուղացիների վարկային բեռը, ասաց եղել է Արմավիրի մարզի գյուղերում, վիճակն աղետալի է:
«Մարդիկ մի քանի մլն վարկեր են կուտակել, որոնց զգալի մասը տույժ ու տուգանք են, իսկ սա նշանակում է, որ իրավիճակը վաթարանալու է: Արևիկ գյուղում գրեթե բոլորը գրավադրել են իրենց տները»,-ասաց նա:
Զուրաբյանն ասաց, որ խնդիրը համակարգային է ու պետք է արժանանա ԱԺ ուշադրությանը: Նա առաջարկեց լսումներ անցկացնել խնդրի շուրջ, խնդիրը քննարկեն ու լուծում տան:
ԱԺ նախագահն ի պատասխան նշեց, որ հարցին պատասխանելու համար մեծ հմտություն պետք չէ, «որովհետև դուք ուզում էիք, որ ժողովուրդը լսեր ձեր այցերի մասին»: Գ. Սահակյանն ասաց, եթե կա առաջարկ, որ խորհրդարանը կարող է քննարկել այսօր կամ վաղը, պատգամավորը դա ներկայացնի, իսկ եթե կա լսումների անհրաժշետություն, ապա հարցը պետք է նախապատրաստվի հանձնաժողովում, որի անդամ է Զուրաբյանը:
ԲՀԿ-ական Նաիրա Զոհրաբյանն էլ քիչ հավանական համարեց, որ փետրվարին նիստ հրավիրվի, քանի որ քաղաքական ուժերը լծված են լինելու քարոզարշավի:
«Մենք շատ մեծ քննարկումների արդյունքում տառ փոխեցինք, բառ փոխեցինք, մի դարակազմիկ համաձայնության եկանք, որ ԱԺ-ում հայտարարություն ընդունվի Հյուսիսային Իրաքում եզդիների հանդեպ կատարվող ցեղասպանական գործողությունների մասին, ես կարծում եմ, որ այստեղ հարցի բարոյական կողմ կա, եթե այս գումարման խորհրդարանն այդ հայտարարությունը չընդունի, ապա մենք բարոյական լուրջ խնդիր կունենանք»,-ասաց պատգամավորը:
Նա հորդորեց հայտարարության նախագիծը քննարկել այս քառօրյայում: Գալուստ Սահակյանը պատասխանեց, որ առաջարկությունը կքննարկի հանձնաժողովի հետ ու պատասխան կտա:
Մտքերի փոխանակման համար հերթագրված չորս պատգամավորներից Լևոն Զուրաբյանն ասաց, որ ժողովրդի հետ հանդիպելու համար չպետք է իրեն նախատել: Գ. Սահակյանին էլ խորհուրդ տվեց գյուղեր գնալ. «Ձեզ այնտեղ սպասում են: Սա համակարգային հարց է, ես առաջարկում եմ ԱԺ նախագահի կարգավիճակ ունեք, նման լսումներ հրավիրելու իրավասություն ունեք, հիմա ես հարց եմ տալիս, կանե՞ք նման բան, այդ հարցը հուզում է հարյուր հազարավոր քաղաքացիների, սա մեր տնտեսության խնդիր է, ժողովրդի հավատի խնդիր է»:
Գ. Սահակյանը կրկնեց պատասխանը՝ խնդիրը բարձրացնել հանձնաժողովում:
Հերթագրված հաջորդ պատգամավորը՝ Նիկոլ Փաշինյանը բարձրացրեց «Աշտարակ կաթ» ընկերության՝ աշխատակիցներին ու գյուղացիներին պարտքերի մարման հարցը, խնդրեց կառավարությունը ուշադրության կենտրոնում պահի դրանց վճարման գործընթացը:
«Մենք կիսում ենք ձեր մտահոգությունը»,-ասաց ԱԺ փոխնախագահ Հ. Նաղդալյանը:
ՀՀԿ-ական պատգամավոր Արա Բաբլոյանն էլ նշեց, որ զարգացման խնդիրներ ունեցող երեխաների ցերեկային խնամքի կենտրոնների ֆինանսավորման մասին առաջին անգամ բյուջեում տող կա:
«Մենք կշարունակենք ջանքեր գործադրել, որ մարզերում նման կենտրոններ ստեղծվեն»,-ասաց նա:
Զարուհի Փոստանջյանը գործընկերների ուշադրությունը հրավիրեց իր կողմից ներկայացված «Ժողովրդի ապստամբության իրավունքը» հայտարարության նախագծի վրա, կարծիք հայտնեց, որ պետք է հարցը օրակարգում ընդգրկելուն կողմ քվեարկել:
«Մենք ունենք խնդիր, լսելու թե ինչո՞ւ ապստամբեցին, զենքը վերցրեցին ու պաշարեցին ոստիկանության շենքը: Դրանից դասեր պետք է քաղենք: Անհրաժեշտ է, որ մենք քննարկենք հայտարարությունը, գուցե կողմ չքվեարկենք դրա դրույթներին»,-ասաց Փոստանջյանը:
Մի քանի օրինագծերի քննարկումը մինչև մեկ տարով հետաձգելուն կողմ քվեարկեց 102 պատգամավոր, դեմ՝ 2, ձեռնպահ՝ 5: Փոստանջյանի հեղինակած հայտարարությունն օրակարգ ընդգրկելուն կողմ քվեարկեց 28 պատգամավոր, դեմ՝ 68, ձեռնպահ՝ 4: Փոստանջյանի՝ «Լյուստրացիայի մասին» օրենքում փոփոխություններ կատարելու մասին օրինագիծը ևս չընդգրկվեց օրակարգ՝ կողմ էր քվեարկել 30 պատգամավոր, դեմ՝ 70, ձեռնպահ 4:
Լրահոս
Տեսանյութեր
Օր չկա, որ մենք փողոցում չտեսնենք բողոքի դուրս եկած տարբեր խմբեր. Բագրատ Սրբազան
