Ձեր վստահելի աղբյուրը

Թալիշի բարեկարգման ուղղությամբ ներկայումս ակտիվ աշխատանքներ են ընթանում: Այս մասին Տավուշի մարզ կատարած այցի շրջանակներում լրագրողների հետ զրույցում ասաց ԼՂՀ վարչապետի մամուլի խոսնակ Արտակ Բեգլարյանը։

«Նախագահի հանձնարարությամբ որոշ պետական մարմիններ ընդգրկված են տվյալ աշխատանքներում: Կարծում եմ` ձմեռվա ընթացքում աշխատանքները մի քիչ դանդաղ տեմպով կընթանան, գարնանը` եղանակային պայմաններից ելնելով, ավելի ակտիվ կլինեն, բայց ենթադրում եմ, որ առաջիկայում արդեն շոշափելի արդյունքներ կլինեն»,- նշեց Արտակ Բեգլարյանը:

Նրա խոսքերով՝ անվտանգության ապահովման համար ևս քայլեր ձեռնարկվում են։ «Թալիշի անվտանգության ապահովումն առաջին հերթին ազգային արժանապատվության հարց է, հետո նոր վերականգնումը, բարեկարգումը կամ վերաբնակեցումը: Այսինքն՝ դրանք ոչինչ են, եթե անվտանգությունը չապահովենք տվյալ գյուղի կամ ընդհանրապես մնացած գյուղերի բնակչության համար: Կարծում եմ, որ համապատասխան քայլեր նաև առաջիկայում կկատարվեն, մինչև հիմա էլ կատարվել են, այսինքն` առաջնագծի ամրապնդման, ինժեներական ամրությունների ստեղծման, ինչը բարձրացնում է նաև Թալիշի բնակչության համար անվտանգության երաշխիքները»,- ընդգծեց Արցախի վարչապետի մամուլի խոսնակը:

Այսպիսով, ըստ նրա, այս երկու ուղությունները` անվտանգության ապահովումն ու բարեկարգումը կատարվում են զուգահեռ և ամեն ինչ արվելու է, որպեսզի Թալիշում անվտանգության հնարավորինս բարձր պայմաններ ստեղծվեն:

Հարցին, թե այս պահի դրությամբ ունի տվյալներ` թալիշցիներից քանիսն են Հայաստանում բնակվում և քանիսն են վերադարձել Արցախ, Արտակ Բեգլարյանը նշեց, որ ինքն այս պահին վերջնական թվերի չի տիրապետում, քանի որ դրանք անընդհատ թարմացվում են: Իր ունեցած տվյալների համաձայն՝  մի մասը նախորդ  ամիսների ընթացքում վերադարձել են Արցախ. Ալաշան համայնքում իրենց համար համապատասխան պայմաններ են ստեղծվել:

«Եթե չեմ սխալվում` 23-24 ընտանիքի համար կան համապատասխան պայմաններ,  բոլորին տրամադրվել է բնակարան կամ առանձնատուն, իսկ մոտ 20 ընտանիքի համար էլ պլանավորվում է առանձին տներ տալ, քանի որ պահանջարկը կա: Հայաստանում ապաստանած թալիշցիների որոշ մասը ցանկություն է հայտնել վերադառնալ Ալաշան, եթե իրենց տրամադրվեն բնակարաններ: Համոզված եղեք, որ Արցախի կառավարությունը համապատասխան պայմանները ստեղծելու է, որպեսզի Արցախից դուրս ապաստանած թալիշցիները վերադառնան և Արցախում մնան»,- ընդգծեց Արտակ Բեգլարյանը: