Ձեր վստահելի աղբյուրը

«Արևելք» կայքէջը զրուցել է հալեպահայ Ն. Յ.-ի հետ, ովքեր կարողացել են առաջինը մուտք գործել Հալեպի Ազգային գերեզմանատուն, որը վերջին հինգ տարիների ընթացքում փակ է եղել: 

Ըստ աղբյուրի, վերջին տասն օրվա ընթացքում Սիրիայի բանակը Հալեպի մեջ գրանցել է հաջողություններ, որոնց շնորհիվ քաղաքի բնակիչներին հասանելի են դարձել այն հատվածները, որոնք անցած տարիներին վերածվել էին զինյալների գործողությունների թատերաբեմ և գտնվում էին ահաբեկիչ զինյալների տիրապետության տակ:

«Գերեզմանատուն առաջին մտնողներն եղանք, շրջանի մեջ մարդ չկար, դուռը հրեցինք ու ներս մտանք», -ասել է«Արևելք»-ի զրուցակիցը:

Պատմել է, որ մի քանի գերեզմաններ կային, որ հրթիռների բեկորներից վնասվել են, բայց դրանք քիչ են եղել:

«Մենք մատուռի մեջ աղոթեցինք, որտեղ երևի հինգ տարուց ի վեր ոչ մի աղոթք չէր հնչել: Մեր ընտանեկան դամբարան նույնպես այցելեցինք ու մոմ վառեցինք: Չէի պատկերացնում այս վիճակում տեսնել գերեզմանատունը, մանավանդ որ դրա շուրջը թեժ մարտեր են եղել: Բավական դժվարությամբ հասանք: Ցանկապատներից մեկի մոտ բանակի զինվորները արգելեցին մեզ՝ ապահովության նկատառումներից ելնելով, սակայն մենք ցույց տվեցինք մեր մոտ եղած մոմերը ու ասացինք, որ այցելում ենք հարազատների շիրիմներին», -պատմել է զրուցակիցը՝  նշելով, որ բաց տեղերով են քայլել, որպեսզի ականների վրա չհայտնվեն: