Ձեր վստահելի աղբյուրը

Ծննդկան Մերի Մարգարյանի և նրա երեխայի մահվան գործով դատական նիստը Շենգավիթ վարչական շրջանի ընդհանուր իրավասության դատարանում այսօր ևս սկսվեց ու ավարտվեց վկաների հարցաքննությամբ:

Հարցաքննվեցին «Շենգավիթ» բժշկական կենտրոնի բուժաշխատողներից երկուսը, իսկ մյուս երեքի հարցաքննությունը կշարունակվի դեկտեմբերի 13-ին կայանալիք դատական նիստում:

Ծննդկան Մերի Մարգարյանի և նրա երեխայի մահվան գործով, հիշեցնենք, ամբաստանյալներ են «Շենգավիթ» բժշկական կենտրոնի մանկաբարձ-գինեկոլոգներ Շուշանիկ Բախշյանն ու Անի Բաբելյանը, որոնք մեղադրվում են հղի Մերիին ոչ պատշաճ բուժօգնություն ցուցաբերելու համար (ՀՀ Քրեական օրենսգրքի 130 հոդված)։

Այսպես, այսօր վկաներից առաջինը հարցաքննվեց բուժքույր Արփինե Մուրադյանը և ասաց, որ 2015 թվականի հուլիսի 27-ին իր հերթապահությունն ընդունելուց հետո Մերիին մանկաբարձական բաժանմունքից տեղափոխել է ինտենսիվ թերապիայի բաժանմունք:

Մեղադրանքը պաշտպանող դատախազը և տուժողի իրավահաջորդի ներկայացուցիչ, փաստաբան Մարինե Թովմասյանը հետաքրքրվեցին, թե իմացե՞լ է ինչ վիճակում է եղել Մերի Մարգարյանը, սակայն վկան ասաց, թե չի իմացել, տեղյակ չի եղել նրա առողջական վիճակի մասին: «Մեզ նրա վիճակի մասին անկետա չեն տվել: Ես միայն տեղափոխել եմ հիվանդին այլ բաժանմունք», -ասաց վկան՝ նշելով, որ հիվանդո զբաղվել է մանկաբաչձ-գինեկոլոգ Շուշանիկ Բախշյանը:

Նիստը նախագահող դատավոր Դավիթ Բալայանը նկատեց, որ վկայի նախաքննական և դատաքննական ցուցմունքներում հակասություններ կան և որ վկան նախաքննության փուլում տված ցուցմունքում ասել է, որ մտել է հիվանդասենյակ, հետաքրքրվել նրա առողջությամբ, սակայն որևէ միջամտություն չի կատարել, քանի որ նա այդ ժամին նշանակումներ չուներ:

Փաստաբան Թովմասյանը հետաքրքրվեց, թե հնարավո՞ր է այդուհանդերձ բուժքույրը չի մտել և չի հետաքրքրվել, Մերիի առողջական վիճակով և նրան մոտեցել է միայն տեղափոխելու ժամանակ, վկան ի պատասխան ասաց, որ հնարավոր է, քանի որ մանրամասներ չի հիշում:

Մյուս վկան «Շենգավիթ» բժշկական կենտրոնի մանկաբարձ-գինեկոլոգ Լիլիթ Գրիգորյանն էր: Նա ասաց, որ հուլիսին եղել է ծնարանի պատասխանատուն, և նրա պարտականությունների մեջ է մտնում հսկել ծնարանի աշխատանքը, ընդունել այն հիվանդներին, ովքեր չունեն հսկող բժիշկ:

Գրիգորյանն ասաց, որ Մերի Մարգարյանին ինքը չի ընդունել ու չի զննել, քանի որ Մերին ունեցել է իրեն հսկող բժիշկը՝ Շուշանիկ Բախշյանին: Ինչ վերաբերում է, թե ինչ է իմացել է Լիլիթ Գրիգորյանը Մերի Մարգարյանի առողջական վիճակի մասին, ապա վկան ասաց, թե տեղյակ է եղել, որ Մերին հիվանդանոց է ընդունվել սուր շնչառական հիվանդությամբ:

Վկայի խոսքով, բժիշկների արագ հավաքի ժամանակ Մերիի մասին զեկուցվել է բժիշկների կողմից և նշվել է, որ նրան հսկում է բժշկուիհի Շուշանիկ Բախշյանը: «Ես այլ մանրամասների մասին տեղյակ չեմ եղել», -ասաց վկան:

Տուժողի իրավահաջորդի ներկայացուցիչ, փաստաբան Մարինե Թովմասյանը նկատեց, որ նախաքննության փուլում ցուցմունք է տվել, թե Մերրի Մարգարյանի անալիզներում եղել են շեղումներ: Ի պատասխան վկան Գրիգորյանը հստակեցրեց, որ իր ասածը վերաբերել է դեպքից հետո տիրապետած տեղեկատվությանը, մինչ այդ ինքը չի իմացել մանրամասների մասին:

Ի դեպ, ամբաստանյալներ Շուշանիկ Բախշյանի և Անի Բաբելյանի պաշտպանությունը բժիշկներին հարցեր չուներ տալու: Ավելին Բախշյանի փաստաբան Ալեքսանդր Սիրունյանը Արփինե Մուրադյանի մասով նկատեց. «Բուժքույր է, ի՞նչ պետք է իմանա, որ հարցեր տանք»: