Ձեր վստահելի աղբյուրը

ՀՀԿ-ն և ՀՅԴ-ն առայժմ չեն քննարկել առաջիկա ընտրություններում դաշինքով հանդես գալու հարցը: ՀՅԴ-ն նման ցանկություն չի հայտնել, ոչ էլ ՀՀԿ-ն: Բայց չի բացառվում նման քաղաքական կոնսուլտացիաներ լինեն ինչպես ՀՅԴ-ի, այնպես այլ քաղաքական ուժերի հետ, եթե լինի նման ցանկություն,- Ազգային ժողովում լրագրողների հետ զրույցում ասաց ԱԺ ՀՀԿ խմբակցության ղեկավար Վահրամ Բաղդասարյանը:

«Մենք բազմիցս նշել ենք, որ որևէ ուժի հետ բանակցելուց, կոնսուլտացիաներից մենք չենք խուսափում»,- ասաց նա:

Հարցին, թե ԲՀԿ-ի հե՞տ էլ պատրաստ եք բանակցել,  Վ. Բաղդասարյանը կրկնեց, որ պատրաստ են բանակցել ցանկացած քաղաքական ուժի հետ:

«Քաղաքականության մեջ չկան մշտական թշնամիներ ու բարեկամներ: Եթե ինչ-որ մեկի հետ խնդիրներ կամ կոնֆլիկտներ ես ունենում քաղաքական դաշտում, համագործակցության բոլոր եզրերը, կամուրջները պետք է վառե՞լ, այրե՞լ: ՀՀԿ-ն իշխող կուսակցություն է, պետք է մեծահոգի լինի: Պարտավոր է բոլոր քաղաքական ուժերին լսել, բանակցել, եթե լինեն նման առաջարկություններ»,- նշեց ՀՀԿ-ական գործիչը:

Խոսելով ընդդիմադիր դաշում միավորումների, «Բարգավաճ Հայաստան» կուսակցության նախկին նախագահ Գագիկ Ծառուկյանի՝ քաղաքականություն հնարավոր վերադարձի մասին, Վ. Բաղդասարյանն ասաց, որ հենց իշխանության հորդորն է եղել, որ ընդդիմադիր դաշտում համերաշխություն լինի, վերջ դրվի մրցակցությանը, թե ով է ամենաընդդիմադիրը:

«Բայց ամենամեծ նպատակը պետք է այն լինի, որ դաշինքները, կոալիցիաները ինքնանպատակ չլինեն, դրանք գաղափարական, ծրագրային հենքի վրա լինեն, ապագայի խնդիր լուծելու համար ստեղծվեն:  Գագիկ Ծառուկյանի հետ կապված, երբ լինի վերջնական հայտարարություն, մենք կանդրադառնանք»,-  ասաց ԱԺ ՀՀԿ խմբակցության ղեկավարը:

Հարցին, թե ինչպե՞ս եք մեկնաբանում այն կարծիքները, որ իշխանությունը  վերադարձնում է Գագիկ Ծառուկյանին ընդդիմադիր դաշտի որոշակի ձայներ կոնսոլիդացնելու համար, Վ. Բաղդասարյանը պատասխանեց.  «Աբսուրդ: Մենք նման հարցերով, խնդիրներով չենք զբաղվում:  Խնդրում եմ՝ Գագիկ Ծառուկյանի ինքնուրույն կերպարի վրա ստվեր մի գցեք»:

Անդրադառնալով վարչապետ Կարեն Կարապետյանի հայտարարությանը, թե ՀՀԿ-ին անդամակցելուց հետո իր վարկանիշը որոշալի չափով նվազել է, նա ասաց, «Հանրությունն ավելի շատ հավատում է անկուսակացկան մարդկանց, առավել ևս վարչապետի պաշտոնում:

Երբ որևէ գործիչն անդամակցում է որևէ կուսակցության, հավատը նվազում է: Եթե  Կարեն Կարապետյանն իրականացնում է ՀՀԿ ծրագրերը,  որովհետև իշխող կուսակցությունը ՀՀԿ-ն է, բնականաբար,  կառավարության ծրագրերը բխում են ՀՀԿ ծրագրերից, նախագահի  նախընտրական ծրագրերից,  ավելի հեշտ կլինի  այդ ծրագրերն իրականցնել, եթե լինի այդ կուսակցության մեջ և ունենա այդ կուսակցությունում  բավականին լուրջ դերակատարություն: Պետք է իրար կողք դնենք՝ իմիջի ինչ-որ չափով նվազո՞ւմ, թե՞ անմիջական մասնակցություն քաղաքական գործընթացներին: Այս՝ պառլամենտական համակարգի իրավիճակում, նոր փուլում, ինձ թվում է, որ բոլոր քաղաքական պաշտոն կրող մարդիկ պետք է որոշեն իրենց կուսակցական պատկանելությունը: Իսկ իմիջի իջնելու կամ բարձրանալու հետ կապված, ինձ թվում է, դա շատ արագ կարող է փոփոխական լինել, երբ որ աշխատանքի արդյունքում հանրությունը, քաղաքական ուժերը  տան իրենց գնահատականը: Այդ ժամանակավոր կորուստը, որ նաև նկատել է վարչապետը, շատ արագ վերականգնվում է»: