Ձեր վստահելի աղբյուրը

ԱԺ-ում «Տեղական ինքնակառավարման մասին» օրենքի նախագիծը քննարկելուց առաջ Ազգային Ժողովը մեկ րոպե լռությամբ հարգեց 1988թվականի դեկտեմբերի 7-ի ավերիչ երկրաշարժի զոհերի հիշատակը:

Քննարկման ժամանակ պատգամավոր Թևան Պողոսյանն  առաջարկեց, որ  այս օրենքով հստակ նշվի՝ կանանց ներգրավածությունն ավագանիում առնվազն 20 տոկոսով:

«Այն երեք համայնքում, որտեղ մենք ունենք համամասնական ընտրություններ, ավտոմատ ստանում ենք, որ ավագանիում նաև կանայք ներգրավվեն: Վերցնելով խոշորացված համայնքների արդյունքները՝ տեսնում ենք, որ խոշորացված համայնքներում կանայք ընդհանրապես ներկայացված չեն ավագանիում, կանանց դերը նվազել է: Չե՞ք համարում, որ շատ կարևոր կլինի այս օրենքով ուժ ստանա կանանց ներգրավածությունն ավագանում  տոկոսային առումով, առնվազն 20 տոկոսը »,- ասաց  պատգամավորը:

Հիմնական զեկուցող տարածքային կառավարման և զարգացման նախարարի  առաջին տեղակալ Վաչե Տերտերյանն ասաց, որ անվիճելի ցանկություն է:

«Այդ նպատակը  մենք էլի ունենք:  Խոշորացվող համայքներում  ՄԱԿ-ի մի ծրագրով  փորձեցինք կանանց ներգրավման գործընթացն ակտիվացնել, աշխատել նրանց հետո, խթանել, բայց   մրցակցության պայմաններում, համենայն դեպս,  առաջին անգամ այդ արդյունքն չարձանագրվեց: Մտահոգիչ է»,- ասաց փոխնարաը:

Վ.Տերտերյանի խոսքով՝ մտածել են այս հարցի մասին, տարբեր մեխանիզմներ քննարկել, սակայն դեռևս չեն գտել:

«Եթե կարող եք հուշել, եթե ունեք պատրաստի դեղատոմս, ասեք»,- ասաց փոխնախարարը: