Ձեր վստահելի աղբյուրը

ԱՄՆ պետքարտուղարը պետք է շուտ մեկներ Համբուրգից, այդ պատճառով հանդիպումը նման մակարդակով չկայացավ,- Համբուրգում լրագրողների հետ ճեպազրույցում հայտարարեց ԱԳ նախարար Էդվարդ Նալբանդյանը, մանրամասնելով, թե ինչու Հայաստանի ու Ադրբեջանի ԱԳ նախարարների հանդիպմանը չեն մասնակցել Մինսկի խումբը համանախագահող երկրների ԱԳ նախարարները:

Նա հիշեցրեց, որ  Մինսկի խմբի համանախագահները, ԵԱՀԿ նախագահի գործող ներկայացուցիչը մասնակցել են նախօրեին կայացած հանդիպմանը:

«Հանդիպումն ինքնին արդեն կարևոր էր: Վերջին անգամ հանդիպել էինք Վարշավայում հուլիսին»,-ասաց նախարարը:

Հանդիպման ընթացքում քննարկված խնդիրների մասին հարցին ի պատասխան Նալբանդյանը վկայակոչեց ԵԱՀԿ Մինսկի խմբի համանախագահների համատեղ հայտարարությունը:

«Այնտեղ հստակ նշված են այն խնդիրները, որոնք եռանախագահողները ցանկանում են քննարկել կողմերի հետ: Թե ինչ է ասում Ադրբեջանի արտգործնախարարը՝ իր գործն է. Մենք պետք է նայենք, թե ինչ են ասում Հայաստանի արտգործնախարարն ու եռանախագահողները»,-ասաց Նալբանդյանը:

Նա նշեց, որ համանախագահների ուժի կիրառման ու դրա վերաբերյալ սպառնալիքը բացառելու վերաբերյալ կոչերն ուղղված են Ադրբեջանին:

«Ադրբեջանն է, որ գնաց խաղաղության դեմ հանցագործությանը: Ապրիլին նա գնաց լայնածավալ ագրեսիվ  գործողությունների, որոնց ընթացքում կատարեց բազմաթիվ բարբարոսություններ: Համանախագահները խստորեն դատապարտում են բարբարոսությունները»,-ասաց նախարարը:

Լրագրողները նկատեցին, որ Մինսկի խմբի համանախագահների կոչերը հասցեական չեն:

«Կարծում եմ նրանք, ովքեր զբաղվում են այս հարցում, լավ պատկերացնում են, թե ում մասին է  խոսքը: Մենք էլ կցանկանայինք, որ հասցեական լինի, բայց միջոնրդները պետք է խոսեն դիվանագիտական լեզվով: Դիվանագիտական լեզուն էլ շատ հստակ էր»,-ասաց Նալբանդյանը: