Ձեր վստահելի աղբյուրը

«Գագիկ Ծառուկյանի վերադարձը քաղաքական կյանքի և քաղաքական գործընթացների համար անհրաժեշտություն է, որովհետև 1,5-2 տարի նրա՝ ակտիվ քաղաքականությունից ժամանակավոր հեռանալը  ցույց տվեց, որ այդ տեղը չլրացվեց»,-Ազգային ժողովում ճեպազրույցների ժամանակ ասաց ԲՀԿ խմբակցության անդամ Միքայել Մելքումյանը:

Նա նշեց, որ Գ. Ծառուկյանի՝ գալու հետ կապված վերջնական, հստակ հարցադրումների, ձևաչափի առանձնահատկությունների մասին իրավունքի ունի միայն նա հայտարարել:

Հարցին, թե հնարավո՞ր է վերադառնալու դեպքում ընտրությունների ժամանակ ԲՀԿ ցուցակը ղեկավարի հենց Գ. Ծառուկյանը, Մ. Մելքումյանն ասաց. «Նա  մեր կուսակցության հիմնադիրն է, դե ֆակտո առաջնորդն  է: Կգլխավորի, թե ոչ, ինչ ձևաչափով և այլն, ինքը որոշի: Կարծում եմ՝ հայտարարությունը չի ուշանա»:

Այնուհետև ԲՀԿ-ական գործիչն ասաց. «Այո ինքն է գլխավորելու նախընտրական ընդհանուր այն սխեման, որով մենք պետք է առաջ շարժվենք,  բայց թե ինչ կոնկրետ դեմքերով, ձևաչափով, դրա մասին միայն ինքը կհայտարարի»: 

Դիտարկմանը, թե ՀՀԿ խմբացության ղեկավար Վահրամ Բաղդասարյանը ԲՀԿ-ն, ինչպես նաև ՀԱԿ-ը համարում է կիսաքայքայման եզրին գտնվող խմբակցություններ, Մ. Մելքումյանն ասաց. «Այդպիսի բան չկա: ԲՀԿ-ն ընտրություններին ցույց կտա, որ ինքը նաև իր արժանի տեղը ունի: Մենք գնալու ենք հաղթելու: Այդ հարցի պատասխանը լինելու է  ապրիլյան ընտրություններից հետո»: