Սերգեյ Մինասյան. Համանախագահների հայտարարության կոշտ ձևակերպումները ուղղված էին Ադրբեջանին

Քաղաքական 15:44 10/12/2016 Տարածաշրջան

Սերգեյ Մինասյան. Համանախագահների հայտարարության կոշտ ձևակերպումները ուղղված էին Ադրբեջանին

ԵԱՀԿ ՄԽ համանախագահների հայտարարությունը ԼՂ հակամարտության կարգավորման գործընթացում Մինսկի խմբի շնրջանակներում արված ամենակոշտ հայտարարություններից մեկն էր, որը երբևէ եղել է,- «Panorama.am»-ի հետ զրույցում նշեց քաղաքագետ Սերգեյ Մինասյանը:

Քաղաքագետը գտնում է, որ ակնհայտորեն այդ կոշտ ձևակերպումները թե ում էին ուղղված՝ գաղտնիք չէ նաև Ադրբեջանի համար:

«Բոլորին էլ հասկանալի է, թե ում էր ուղղված համանախագահների հայտարարությունը, մասնավորապես՝ երբ խոսքը գնում է ապրիլյան իրադարձությունների, քաղաքացիական անձանց հանդեպ բռնությունների կիրառման մասին, այդ ամենի հասցեատերը Ադրբեջանն է: Ինչպես նաև այն, որ պետք է կատարվեն Վիենայի և Սանկտ-Պետերբուրգի գագաթաժողովներում ձեռք բերված պայմանավորվածությունները, նույնպես ուղղված է Ադրբեջանին, դրանում կասկած չկա»,- նշեց քաղաքագետը:

Անդրադառնալով Ադրբեջանի նկատմամբ զսպողական քայլերի կիրառմանը Մինասյանը նշեց, որ Ադրբեջանին ոչ միայն դիվանագիտական հայտարարությունների ֆորմատով են զսպում, այլ նաև քաղաքական և ռազմաքաղաքական քայլերով. «Եթե մենք դիտարկենք միայն ՄԽ շրջանակներում, ապա զսպման այդ տրամաբանությունը տեսանելի է և, բացի հրապարակային հայտարարություններից, կարծում եմ, նաև անմիջական հանդիպումների ժամանակ այդ մեսիջը ադրբեջանական կողմին հասցվել է: Բացի այդ, կա նաև երկկողմ հարաբերությունների ձևաչափ Ռուսաստանի, ԱՄՆ-ի, Ֆրանսիան և ԵՄ-ի հետ, որոնց շրջանակներում Ադրբեջանի հետ այդ մասին քննարկվում է»:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: