Ձեր վստահելի աղբյուրը

Պաշտպանության նախարար Վիգեն Սարգսյանն այսօր պատգամավորներին խնդրեց «ՀՀ պաշտպանության ժամանակ զինծառայողների կյանքին կամ առողջությանը պատճառված վնասների հատուցման մասին» օրենքի նախագծի քվեարկության հարցում լինել շատ ուշադիր:

«Յուրաքանչյուր կողմ քվեն շատ կարևոր է, և բոլոր նրանք, ովքեր ինչ-ինչ պատճառներով չեն կարողանում սատարել այս օրենքին, շնորհակալ կլինեմ չմասնակցության համար կամ գոնե ձեռնպահ քվեարկելու համար»,-ասաց նախարարը:

ՕԵԿ-ական պատգամավոր Հեղինե Բիշարյանը հետաքրքրվեց, թե ինչու են մերժել իր առաջարկությունը: Նա  կոչ էր արել ապահովագրել զինծառայության ընթացքում զոհված կամ հաշմանդամություն ձեռք բերեծ ցանկացած զինվորի՝ անկախ հանգամանքներից:

«Այո, այս օրենքի նպատակն է տարանջատել ու հատուկ շեշտել այն զինծառայողների ներդրումը, որոնք անմիջական ներգրավածություն են ունեցել մարտական հերթապահության մեջ: Դա բացարձակ այլ ձևաչափ է ծառայության, շատ բարձր ռիսկայնությամբ,   մեծ նվիրում, կենտրոնացում պահանջող»,-պատասխանեց Վիգեն Սարգսյանը:

Նա նշեց, որ գործում է սոցիալական օրենսդրություն, որը նախատեսում է  աջակցություն զինհաշմանդամություն ունեցող, ծառայողական պրատականությունները կատարելիս մահացած զինվորների ընտանիքներին:

«Այս օրենսդրությունը մեկ քայլ առաջ է և կոչված է լուծել բոլորովին այլ խնդիր»,-ասաց նախարարը:

Ինչ վերաբերում է հարցին, հնարավո՞ր է օրենքը տարածվի 2016-ի ապրիլին զոհված և հաշմանդամություն ձեռք բերած զինծառայողների վրա, ապա Վիգեն Սարգսյանն ասաց, որ հիմնադրամը կարող է օգնության կարգով որոշ խնդիրներ լուծել, եթե հավաքագրվեն լրացուցիչ գումարներ կամ եթե աստված տա, հավաքված գումարի կարիքը չզգացվի:

«Պետք է ասեմ, որ ապրիլյան իրադարձություններից հետո հանրային արձանագանքը եղել է շատ ուժգին, մենք տեսել ենք լայնածավալ աջակցություն»,-ասաց նախարարը, ավելացնելով, որ ապրիլյան պատերազմում զոհվածների ընտանիքների աջակցությունը պետության սուրբ պարտքն է:

ՕԵԿ-ական պատգամավոր Հովհաննես Մարգարյանն էլ հայտարարեց, որ իրենք կողմ ենք քվեարկելու նախագծին: