Ձեր վստահելի աղբյուրը

Այսօր խորհրդարանում «ՀՀ պաշտպանության ժամանակ զինծառայողների կյանքին կամ առողջությանը պատճառված վնասների հատուցման մասին» օրենքի նախագծի քննարկման ժամանակ ԲՀԿ խմբակցության պատգամավոր Գուրգեն Արսենյանը Պաշտպանության նախարարին հարցրեց, թե ինչո՞ւ են փորձում հիմնադրամը հանել շահութահարկից, եթե հիմնադրամը շահույթ չհետապնդող կազմակերպություն է, ապա այս դեպքում ինչ է փոփոխություն արվում «Շահութահարկի մասին» օրենքում, պետք է սոցիալական հարցեր լուծի:

«Փոփոխությունները, որ բերել եք, ունեն հետևանք, իմ կարծիքով՝ այդ հետևանքները բերում են մի իրավիճակ, երբ որ այդ հիմնադրամը ստանալու է ցեմենտ-բետոնե կարգավիճակ, այսինքն՝ պաշտպանված է լինելու պատկան մարմինների կողմից իրականացվող ցանկացած գործողություններից: Ստացվում է, որ ստեղծվում է մի օղակ, որը սովետական արտահայտությամբ ասած, դարձնում եք պետություն պետության մեջ: Արդյո՞ք սա ամենակարևոր հիմնադրամն է մեր պետականության մեջ»,- հարցրեց նա:

Վիգեն Սարգսյանը պատասխանեց. «Յուրաքանչյուր հիմնադրամ ունի իր կարևորությունը, յուրաքանչյուր հիմնադրամ ձևավորվում է համապատասխան իրավական ակտերով: Հիմնադրամը շահույթ հետապնդող չէ, բայց շահույթ կարող է ունենալ, որովհետև կարող է թողարկել պարտատոմսեր և այլն»:

Գուրգեն Արսենյանը նշեց, որ պետք է հրավիրել մասնագետների ու այդ հարցը նորից քննարկել, ինչին Վիգեն Սարգսյանը համաձայնեց: