Ձեր վստահելի աղբյուրը

Ոստիկանության ՊՊԾ գնդի գրավման համար մեղադրվող «Սասնա ծռեր» խմբի գործով մեղադրյալ, այդ օրվանից «հաց բերող» անվանումն ստացած Արթուր Սարգսյանի պաշտպաններ Տիգրան Եգորյանն ու Դավիթ Գյուրջյանը հայտարարություն են տարածել՝ տեղեկացնելով, որ Արթուր Սարգսյանի առողջական վիճակը ծանր է, ունի առողջական խնդիրներ:

«Ա. Սարգսյանի մոտ առկա է զինծառայության ընթացքում ստացած Բեխտերևի հիվանդություն, ինչպես նաև նա տարել է ողնաշարի վիրահատություն՝ C1 և C2 մասնահատումով և պրոտեզավորմամբ: Ա. Սարգսյանի մոտ առկա է նաև որովայնային գծային ճողվածք՝ բավականին մեծ չափսերի:

Հիշյալ պատճառներով Ա. Սարգսյանն ունի ֆիզիկական գործունեության սահմանափակումներ և ունի հատուկ պայմանների կարիք: Հիշյալ առողջական խնդիրների նկատմամբ անտարբերությունը, խնամքի բացակայությունը և պահման ոչ բավարար պայմանները կարող են վտանգավոր հետևանքների պատճառ դառնալ նրա կյանքի և առողջության համար:Արթուր Սարգսյանը կալանավորման պահից ունի անընդհատյա ցավեր և գրեթե ամեն օր ստանում է ցավազրկող միջոցներ (Կետոնալ միջմկանային):

Սեպտեմբեր ամսվա ընթացքում Ա. Սարգսյանի մոտ ցավերը մարմնի տարբեր հատվածներում, այդ թվում՝ որովայնի, սաստկացել են, և նա մի քանի անգամ բժիշկ է հրավիրել, սակայն այդպես էլ նրան օգնություն չի ցուցաբերվել (բժիշկ է կանչվել հերթափոխի պետերի, ինչպես նաև հարկի հերթապահի միջոցով):

Այնուհետև Ա. Սարգսյանը դիմել է Նուբարաշեն քրեակատարողական հիմնարկի պետի տեղակալ Նազարյանին, ով վերջապես հրավիրել է ինչ-որ բժշկի (ոչ Նուբարաշեն ՔԿՀ աշխատակցի), որն ասել է, որ անհրաժեշտ է դիմում, որպեսզի իրականացվի համապատասխան բուժօգնություն:

Սույն թվականի դեկտեմբերի 10-ին Ա. Սարգսյանի մոտ սկսվել են գլխապտույտներ, սրտխառնոցներ և փսխումներ: Դեկտեմբերի 11-ին Ա. Սարգսյանի մոտ արդեն սկսվել են արյունային փսխումներ, և նորից բժիշկ հրավիրվելու պահանջ է ներկայացվել Նուբարաշեն ՔԿՀ վարչակազմին: Այցելել է Նուբարաշեն ՔԿՀ-ի բժիշկը և ցավազրկող է առաջարկել, չափել է ճնշումը, որը 110/160 էր, և ասել է, որ լուրջ խնդիր չկա, և գնացել, իսկ Ա. Սարգսյանի շտապօգնություն հրավիրելու պահանջը մերժվել է:

Դրանից 15-20 րոպե հետո Ա. Սարգսյանի մոտ ավելի մեծ արյան քանակությամբ փսխումներ են սկսվել: Նորից հրավիրվել է բժիշկ, կրկին այցելել է Նուբարաշեն ՔԿՀ-ի բժիշկը, կրկին շտապօգնություն հրավիրելու պահանջը մերժվել է: Դրանից մոտ երկու-երեք ժամ անց Ա.Սարգսյանի վիճակի շարունակական վատթարացման արդյունքում կանչվել է շտապօգնություն, և Ա.Սարգսյանը տեղափոխվել է «Էրեբունի» բժշկական կենտրոն:

«Էրեբունի» բժշկական կենտրում իրականացվել է հետազոտություն, ինչի արդյունքում ախտորոշվել է կերակրափողի էրոզիա և ճաք, որից տեղի էր ունենում արյան արտահոսքը, աղեստամոքսային համակարգի խնդիրներ, նշանակվել է բուժում դեղորայքի և ներերակային կաթիլային ներարկումների միջոցով: Այնուհետև Ա.Սարգսյանը կրկին տեղափոխվել է Նուբարաշեն ՔԿՀ: Ա. Սարգսյանի առողջական խնդիրների ախտորոշումը և նշանակված բուժումը չի տրամադրվել վերջինիս:

Հիշյալ հիվանդությունների արդյունավետ բուժումն ակնհայտորեն չի կարող ապահովվել Նուբարաշեն ՔԿՀ-ում, իսկ պատշաճ որակի բուժօգնություն տրամադրելու հարցում Նուբարաշեն ՔԿՀ-ի վարչակազմը չի շտապում: Աղեստամոքսային խնդիրների պարագայում բուժման բաղադրիչ է նաև հատուկ սննդակարգը, որը ևս Նուբարաշեն ՔԿՀ-ում բացակայում է, բավարար չի կարելի համարել նաև պահման պայմանները՝ հաշվի առնելով, որ դեկտեմբերի 12-ի դրությամբ այն խուցը, որում պահվում է Ա.Սարգսյանը, ինչպես նաև առանձնատեսակցությունների համար նախատեսված սենյակները չեն ջեռուցվում:

Այսօր Ա.Սարգսյանի պաշտպանների կողմից համապատասխան դիմումներ են ուղարկվել ՀՀ Արդարադատության նախարարություն, քրեակատարողական հիմնարկների վարչություն, Նուբարաշեն ՔԿՀ և Մարդու իրավունքների պաշտպանի գրասենյակ՝ պահանջելով անհապաղ ձեռնարկել բոլոր անհրաժեշտ միջոցները՝ Ա. Սարգսյանին պատշաճ բուժզննություն և օգնություն տրամադրելու ուղղությամբ, ինչպես նաև վերջինիս տեղափոխել քաղաքացիական հիվանդանոց և ապահովել պատշաճ բուժում և խնամք»,-ասված է Սարգսյանի պաշտպանների հայտարարության մեջ:

Նշենք, որ երեկ ԱՆ ՔԿՀ-ն պաշտոնապես տեղեկացրել էր, որ Արթուր Սարգսյանը որովայնի շրջանում ունեցել է ցավեր և նրան տեղափոխել են «Էրեբունի» ԲԿ, որտեղ ստացել է բուժօգնություն և տեղափոխվել ՔԿՀ: