Ձեր վստահելի աղբյուրը

Ազգային ժողովում «ՀՀ պաշտպանության ժամանակ զինծառայողների կյանքին կամ առողջությանը պատճառված վնասների հատուցման մասին» նախագծի իրականացման համար համալրվող 9 օրենքների նախագծերի քննարկման ժամանակ  ՀԱԿ խմբակցության քարտուղար Արամ Մանուկյանը դիմելով  Պաշտպանության նախարար Վիգեն Սարգսյանին՝  ասաց, թե առաջին ընթերցումից հետո բազմաթիվ հանդիպումներ են ունեցել հասարակության ներկայացուցիչների հետ:

«Կարող եմ ասել, որ 100 %-ով բոլորը գտնում են՝  անարժանապատիվ  քայլ է, երբ պետությունն ընդամենը 10 մլն դոլարի համար հասարակության վրա նոր լրացուցիչ բեռ է դնում: Ուսումնասիրություն արե՞լ եք՝  Ձեր այս քայլն ինչ արձագանք է գտել»,-հարցրեց պատգամավորը:

Վիգեն Սարգսյանը պատասխանեց, որ Հայաստանում չկա մի հարց, որի շուրջ միակարծություն լինի, և դա իրեն ուրախացնում է, որովհետև դա ժողովրդավարության առանցքն է, իսկ եթե բոլորն ամեն ինչի հետ համաձայն են, ապա դա արդեն մտահոգիչ է:

«Համաձայն եմ, որ կան մարդիկ, որոնք կիսում են Ձեր տեսակետը: Ինձ համար շատ կարևոր ցուցիչ էր առաջին ընթերցման ժամանակ խորհրդարանի քվեարկությունը, որովհետև ես ժողովրդի կարծիքը գնահատելու երկու  ձև գիտեմ՝ հանրաքվե և Ազգային ժողովում քվեարկություն»,- նշեց նախարարը:

Արամ Մանուկյանը Վիգեն Սարգսյանին խնդրեց նաև պարզաբանել, թե 27 տարեկանը լրացած ՀՀ քաղաքացիները գումար վճարելու դեպքում դուրս կգան հետախուզման ցուցակի, այսինքն՝ համաներում լինելո՞ւ է, թե ոչ:

Նախարարը  պատասխանեց.  «Դուք պատգամավոր եք, լավ գիտեք, որ ամնիստիայի թեման շատ շահավետ է ձայներ գրավելու համար, բայց դրա իրականացման գործընթացը միշտ շատ նրբությունների հետ է կապված: Դրա նախապես հայտարարումը իրականում ոչ լեգիտիմ պրակտիկա կլիներ, որովհետև դա կդրդեր բազմաթիվ այլ խնդիրների: Հարգում եմ ձեր հարց տալու իրավունքը, հասկանում եմ ինչու եք տալիս, հաջողություն ձեզ առաջիկա ընտրություններում»: