Ձեր վստահելի աղբյուրը

Ազգային ժողովի փոխնախագահ Էդուարդ Շարմազանովն այսօր լրագրողների հետ զրույցում անդրադարձել է «Համախմբում» կուսակցության առաջնորդ Վարդան Օսկանյանի հայտարարությանը, թե չի բացառվում, որ նախընտրական դաշինք կազմեն «Ժառանգություն» կուսակցության առաջնորդ Րաֆֆի Հովհաննիսյանի և պաշտպանության նախկին նախարար Սեյրան Օհանյանի հետ:

Պատասխանելով Սեյրան Օհանյանի՝ քաղաքականություն մտնելու հնարավորության մասին հարցին, ԱԺ փոխնախագահն ասաց, որ Սեյրան Օհանյանն որևէ հայտարարություն չի արել: «Երկրորդ՝  ՀՀ յուրաքանչյուր  քաղաքացի, ինչպես նաև նախկին պաշտոնյաները, իրավունք ունեն զբաղվել քաղաքականությամբ: Ինչ վերաբերում է մեր երկու նախկին արտաքին գործերի նախարարների և պաշտպանության նախկին նախարարի հնարավոր եռյակ դաշինքին, ապա դա իրենց խնդիրն է: Ես դա ոչ մեկնաբանելու, ոչ ողջունելու, ոչ էլ չողջունելու խնդիր չեմ տեսնում», - ասաց Էդուարդ  Շարմազանովը:

Նրա խոսքերով՝  առհասարակ չկա ընդդիմադիր, իշխանամետ, ժողովուրդն է ընտրություններին որոշում՝ ով է դառնում ընդդիմադիր, ով՝ իշխանություն: «Մենք քաղաքական մրցապայքարում հատուկ թիրախներ չենք ընտրում, որ ինչ-որ մեկի դեմ չենք պայքարում: Անկախ նրանից՝ Պողոսը, Պետրոսը կամ Մարտիրոսը կվերադառնան քաղաքականություն, թե չէ, մենք ունենք մեր ներքին քաղաքական օրակարգը, գնալու ենք այդ օրակարգով, իսկ այդ օրակարգը նախանշել է ՀՀ  նախագահ Սերժ Սարգսյանը»,- նշեց ԱԺ փոխխոսնակը:

Հարցին, թե արդյոք Վարդան Օսկանյան-Րաֆֆի Հովհաննիսյան-Սեյրան Օհանյան հնարավոր դաշինքը լուրջ մրցակից համարում է ՀՀԿ-ի համար, Է.Շարմազանովը պատասխանեց, որ չի կարող խոսել մի բանի մասին, որը դեռևս գոյություն չունի.  «Երբ գոյություն կունենա, կտեսնենք՝ աջակցություն ունի ժողովրդի կողմից, թե ոչ,  այդ ժամանակ կխոսենք: Ես չեմ ցանկանում հիմա օդի մեջ վերացական մտքեր արտահայտել»,- նշեց նա:

Նրա խոսքերով՝  Արամ Սարգսյան-Մարուքյան-Փաշինյան միությունից հետո, ընդդիմադիր դաշտում հնարավոր է նոր դաշինքներ լինեն, միգուցե մեկն էլ սա լինի:  «ՀՀԿ-ն պատրաստ է ազատ, հավասար մրցակցային պայմաններում մրցակցել բոլոր քաղաքական ուժերի հետ, անկախ նրանից՝ դա կլինի պաշտպանության նախկին նախարար, մեծահարուստ նախկին կամ ներկա գործիչ, նախկին խոշոր քաղաքական գործիչ, երիտասարդ եռյակ դաշինք, թե նոր քաղաքականություն մուտք գործող քաղաքական ուժ: Մենք հարգանքով ենք վերաբերում մեր բոլոր քաղաքական օպոնենտներին»,- ընդգծեց  Էդուարդ Շարմազանովը:

Հարցին՝ ինչո՞ւ ՀՀԿ-ն չփորձեց Սեյրան Օհանյանին իր շարքերն ընդգրկել և քաղաքական գործընթացներին մասնակից դարձնել հենց իր ցուցակով, ԱԺ փոխնախագահը պատասխանեց. «Սեյրան Օհանյանի մասով հարցերը պետք է ուղղեք հենց իրեն: Քանի դեռ պաշտպանության նախկին նախարար, Արցախի հերոս Սեյրան Օհանյանը իր քաղաքական ծրագրերի մասին չի խոսել, իր քաղաքական տեսլականը, ռազմավարությունը չի ներկայացրել, ես քաղաքական նոնսենս եմ համարում մեկնաբանություններ տալը»: