Ձեր վստահելի աղբյուրը

ՀՀ Ազգային ժողովի արտահերթ նիստում այսօր քննարկման դրվեց  Կառավարության կողմից ներկայացված «ՀՀ պաշտպանության ժամանակ զինծառայողների կյանքին կամ առողջությանը պատճառված վնասների հատուցման մասին» նախագիծը և հարակից օրենքների նախագծերի փաթեթը երրորդ ընթերցմամբ ընդունելու հարցը:

Հիմնական զեկուցող, ՀՀ պաշտպանության նախարար Վիգեն Սարգսյանը իր ելույթում շնորհակալություն հայտնեց  նախագծերի փաթեթի քվերակության համար: 

«Ոզում եմ շնորհակալություն հայտնել այսօրվա քվերակության արդյունքների համար, որոնց արդյունքները շատ խոսուն էին, հստակ՝ հաշվի առնելով խմբակցություններից մեկի բացակայությունը կուսակցական միջոցառմանը մասնակցելու պատճառով: Ես հասկացա, որ առաջին ընթերցումից հետո ունենք նաև կողմ քվեարկածների, սատարողների թվային աճ»,- ասաց նախարարը:

Նրա խոսքերով՝  իր համար շատ կարևոր է, որ նախագծին աջակցել են ԱԺ բոլոր խմբակցություններից պատգամավորներ և խմբակցությունների մեծ մասը միաձայն կողմ են քվեարկել: «Դա մեծ վստահություն է ներշնչում, որ ունենք վստահության այն քվեն, որով այս օրենքի իրագործումը պետք է կյանքի կոչվի»,- ընդգծեց Վիգեն Սարգսյանը:  

Պաշտպանության նախարարը նշեց, որ երրորդ ընթերցման ժամանակ կատարվել են զուտ խմբագրական փոփոխություններ: