Ձեր վստահելի աղբյուրը

Լեզվաբան Փառանձեմ Մեյթիխանյանի ամուսնուն՝ Եղիշե Խաչատրյանին առանձնակի դաժանությամբ սպանելու համար մեղադրվող Յուրի Հակոբյանի ալիբին հաստատվել է, դեպքի վայրում եղած անձանցից որևէ մեկը չի մատնանշել,  որ Յուրի Հակոբյանը եղել է այդտեղ: Այդ մասին Panorama.am-ի թղթակցի հետ զրույցում ասաց Հակոբյանի փաստաբան Արմեն Նադիրյանը:

Ավելի վաղ Panorama.am-ը տեղեկացրել էր, որ լեզվաբանի ամուսնու՝ Եղիշե Պետրոսյանի դաժան սպանության գործով նախաքննությունն ավարտվել է, և կողմերն այժմ ծանոթանում են գործի նյութերին: Այս գործով մեղադրյալները վեցն են՝ ԴԱՀԿ նախկին աշխատակից Խաչիկ Կոսյանը, Արարատ Նիկողոսյանը, Արտաշես Չիչոյանը, Յուրի Հակոբյանը, Արթուր Զաքարյանը և Հարություն Գրիգորյանը:

Նրանցից առաջին 5-ին առաջադրված մեղադրանքները ծանր են՝ ՀՀ Քրեական օրենսգրքի 104-րդ հոդվածի 2-րդ մասի 7-րդ կետով (առանձնակի դիտավորությամբ սպանություն՝  մի խումբ անձանց կողմից) և խուլիգանության հատկանիշներով: 6-րդին՝ Հարություն Գրիգորյանին մեղադրանքն առաջադրվել է հանցագործության պարտակման համար: Դեպքը տեղի էր ունեցել հունիսի 4-ին, ժամը 23-00-ի սահմաններում, երբ, ըստ նախաքննության, մի խումբ անձինք Երևան քաղաքի Նուբարաշենի խճուղի 5/1 հասցեի դիմաց բազմաթիվ հարվածներ են հասցրել Եղիշե Մանուկի Խաչատրյանի կենսական կարևոր օրգանի՝ գլխի, ինչպես նաև՝ կրծքավանդակի և որովայնի շրջաններում՝ պատճառելով կյանքի հետ անհամատեղելի վնասվածքներ և դիմել փախուստի:

Տուժողի իրավահաջորդի ներկայացուցիչ, փաստաբան Ինեսսա Պետրոսյանը ասուլիսում հայտարարել էր, որ քրեական գործի նյութերով Յուրի Հակոբյանի այլուրեքությունը, այսինքն՝ ալիբին հաստատվել է: Մինչդեռ Հակոբյանի պաշտպանական կողմն այժմ այլ բան է պնդում.

«Իրենք ուղղակի չեն ուզում արդարացնող ապացույցները տեսնել ու անընդհատ կոնտեքստից դուրս ներկայացնում են տեսագրությունների ժամերը: Յուրի Հակոբյանը ի սկզբանե ասել է, որ իրենք եղել են «Լիդո ռեստորանային համալիրում՝ քննարկելու իր հարսանիքի նախապատրաստության հետ կապված հարցերը, որը պետք է կայանար օգոստոսին: Եղել են այնտեղ Արարատ Նիկողոսյանի, նրա ընկերուհու՝ Մարիամ Գրիգորյանի, Խաչիկ Կոսյանի, Արտաշես Չիչոյանի հետ: Ինքն էլ եղել է դասընկերոջ՝ Ռաֆայել Պետրոսյանի հետ:

Հետո Արտաշես Չիչոյանը Հակոբյանից խնդրել է մեքենայի բանալիները. նա էլ չի մերժել, տվել է բանալիները, իսկ ինքը Ռաֆայել Պետրոսյանի հետ մնացել է ռեստորանում՝ շուրջ 40 րոպե: Հետո զանգել է՝ Արտաշեսին, որ իմանա, երբ են գալիս, որ մեքենան վերցնի, բայց չի կարողացել կապվել նրանց հետ: Հետո Ռաֆայել Պետրոսյանի հետ դուրս են եկել ռեստորանից, հանդիպել են մյուս դասընկերոջ՝ Գևորգ Սարգսյանին և նրա մեքենայով միասին գնացել են «Վիվարո» գրասենյակ, որտեղ մնում է բավականին երկար ժամանակ՝ շուրջ երկու ժամ: Այդ գրասենյակում նա եղել է տեսախցիկների դիտարկման ներքո: Եվ շատ լավ երևում է՝ այդ մարդն անհանգիստ չէ: Ավելին «Վիվարոյի» տեսախցիկները նրան ֆիքսել են գրասենյակում ժամը 23:41 և դա այն պահն է, որ դեպքը եղել, վերջացել է», -գործի նյութերը ներկայացրեց փաստաբան Նադիրյանը:

Փաստաբանի ներկայացմամբ, բազմաթիվ մարդիկ, այդ թվում՝ «Լիդո» ռեստորանային համալիրի մենեջերը, մատուցողը, պահակը, ընկերները՝ Ռաֆայել Պետրոսյանը, Գևորգ Սարգսյանը հաստատել են Յուրի Հակոբյանի այլուրեքությունը:

Տուժող կողմի ներկայացուցիչ Ինեսսա Պետրոսյանը հայտարարել էր, որ բոլոր մեղադրյալներին ճանաչման քննչական գործողության ժամանակ Եղիշե Պետրոսյանի մայրը՝ Էմմա Աբրահամյանը, որը նույնպես եղել է դեպքի վայրում, ճանաչել է նաև Յուրի Հակոբյանին:

Այս առնչությամբ պարոն Նադիրյանը մեզ հետ զրույցում նկատեց, որ Էմմա Աբրահամյանը երկու անգամ է ճանաչման քննչական գոգործողություն անցել՝ առաջին անգամ տիկին Էմման ասել է, որ բոլոր մեղադրյալից իր մոտ տպավորվել է մեկը՝ կարմիր վերնաշապիկով անձը, մյուսները չեն տպավորվել: Իսկ ահա երկրորդ անգամ, Նադիրյանի փոխանցմամբ, Մեյթիխանյանը ներկայացել է նախաքննական մարմնին, ասել, որ իր սկեսուրը հիշել է հանգամանքներ ու դրանից հետո կանչում և դարձյալ հարցաքննում են Էմմա Աբրահամյանին:

«Նրան առաջարկում են փորձել վերհիշել որդուն ծեծի ենթարկած անձանց: Աբրահամյանը ասում է, որ համացանցում տեսել է հետախուզման մեջ գտնվողներ՝ Արարատ Նիկողոսյանի, Արտաշես Չիչոյանի լուսանկարները, նրանց վերհիշել է, բայց նրանց հետ եղած երրորդ անձին ես ոչ հագուստով, ոչ դեմքով չեմ կարող նկարագրել, նա ինձ մոտ չի տպավորվել: Բայց Յուրի Հակոբյանը այսօր մեղադրվում է առաջին եռյակին առաջադրված մեղադրանքով», -հավելեց Արմեն Նադիրյանը:

Գործով նախաքննություն իրականացնող Հատուկ քննչական ծառայությունը, փաստաբանի խոսքով, հաշվի չի առել Հակոբյանի այլուրեքությունը փաստող ապացույցները ու ծանր մեղադրանք է առաջադրել նրա նկատմամբ: Ավելին, նախաքննական մարմինը օրերս մերժել է Յուրի Հակոբյանի նկատմամբ քրեական հետապնդումը դադարեցնելու մասին փաստաբանի միջնորդությունը:

Ինչ վերաբերում է դատատոքսիկաքիմիական փորձաքննության արդյունքներին, որոնց համաձայն մեղադրյալները այդ պահին եղել են թմրանյութի ազդեցության տակ, Արմեն Նադիրյանն ասաց, որ այդ մասին հայտարարությամբ անմեղության կանխավարկած է խախտվել, քանզի փորձաքննությունը ցույց է տվել, որ հայտնաբերված թմրանյութի հետքերը օգտագործման վաղեմությամբ համապատասխանում են 4-6 ամսվա:

«Այս ամենի հետ կապված շատ չփարատված կասկածներ կան ու հաստատված չէ և չի կարելի մարդու անմեղության կանխավարկածը կոպիտ խախտել: Իմ պաշտպանյալը ծանոթանալով փորձաքննության արդյունքներին, հայտարարել է, որ դրանց հետ համաձայն չէ: Ավելին այդ մասով որևէ քննություն չի կատարվել», -նկատեց փաստաբանը:

Նրա խոսքով, նման հայտարարությունները արատավորում են իր պաշտպանյալի հեղինակությունը և բարի համբավը, և Հակոբյանն այժմ ծանր վիճակում է: