Ձեր վստահելի աղբյուրը

2017 թվականի հունվարի 1-ից ՀՀ խմելու ջրի համակարգի նոր՝ միասնական օպերատորը կանցնի աշխատանքի: Այսօր լրագրողների հետ հանդիպմանն այս մասին հայտարարեց ՀՀ ԷԵԲՊՆ Ջրային տնտեսության պետական կոմիտեի  նախագահ Արսեն Հարությունյանն՝ տարեվերջյան ամփոփիչ ասուլիսի ժամանակ:

«Խմելու ջրի համակարգերը մեկ վարձակալի հանձնելու մրցույթի առաջին փուլին մասնակցել է 4 ընկերություն, որոնցից 2-ը չեն հաղթահարել նախաորակավորման փուլը: Մրցույթի արդյունքում հաղթող է ճանաչվել  «ՎԵՈԼԻԱ Օ-ԿՈՄՊԱՆԻԱ ԺԵՆԵՐԱԼ ԴԵԶ Օ ԿԲԸ» ընկերությունը: Հունվարի 1-ից օպերատորը սահմանել է խմելու ջրի միասնական սակագին՝ ողջ հանրապետության տարածքի համար 1խմ 180 դրամ»,-տեղեկացրեց Հարությունյանը:

Հիշեցնենք, որ նախորդ 10 տարիների ընթացքում գործել է խմելու ջրի համակարգի 5 օպերատոր՝ «Երևան Ջուր» (170,3 դրամ), «Հայջրմուղկոյուղի» (179,8), «Լոռի-ջրմուղկոյուղի» (181,0), «Շիրակ-ջրմուղկոյուղի» (172,2) և «Նոր Ակունք» (202,6):

Լրագրողները Ջրային տնտեսության պետական կոմիտեի  նախագահից հետաքրքրվեցին Հայաստանում խմելու ջրի որակից, ինչին ի պատասխան նա ասաց. «Հայաստանի խմելու ջուրը աշխարհում լավագույններից է: Սակայն մենք ունենք տարածաշրջաններ, որտեղ ջրի խնդիր կա, կոնկրետ Արմավիրի մարզում, որտեղ խմելու ջուրը համարվում է Հայաստանում ոչ ամենալավը: Ներկայումս տվյալ տարածքի օպերատորն է «Նոր Ակունք»-ը և այդ տարածքի բնակչությունը խմելու ջրի համար վճարում է ամենաբարձր սակագինը: Նոր օպերատորի հետ քննարկել ենք մարզի համար այլ ջրագծի կառուցման հարցը, որի արդյունքում ավելի լավ որակի ջուր կհասցվի Արմավիր»:

Իսկ թե ընդհանուր դաշտում ինչ կփոխի մեկ օպերատորի գործունեությունը, պաշտոնյան հայտնեց, որ առաջիկա 15 տարիների ընթացքում մեկ օպերատորի կողմից իրականացվելու է շուրջ 37,5 մլրդ դրամի ներդրում, ինչն ամբողջությամբ ուղղվելու է խմելու ցանցի վերականգնմանը:

Հարությունյանի խոսքով՝ վերականգնման և բարելավման համար նախատեսվում է նաև պետության կողմից ներդրումներ:

Ինչ վերաբերում է հունվարի 1-ից գործող 180 դրամ սակագնին,  Արսեն Հարությունյանը նշեց, որ  առաջիկայում սակագնի բարձրացման մասին խոսք չի գնում. «Նոր ընկերության հետ կնքած պայմանագրում հստակ պայմաններ ու կատարողական ցուցանիշներ կան դրված, որը օպերատորը պետք է ապահովի, չապահովելու դեպքում՝ ընկերությունը կտուգանվի: Տուգանքի չափը կարող է հասնել մինչև պայամանգրի ողջ գումարի չափին՝ շուրջ 90 մլրդ դրամ է, դա այն գումարն է, որը նոր օպերատորը վճարելու է որպես վարձավճար 15 տարիների ընթացքում»: