Ձեր վստահելի աղբյուրը

«Ամբողջ տարվա ընթացքում պարբերաբար խոսվում էր տարբեր տեսակի կանթնամթերքում առկա տարբեր խնդիրների մասին: Դրանց մասին հատկապես  խոսվեց հասարակական սեգմենտի կողմից իրականացվող մոնիթորիգներից հետո»,- լրագրողների հետ հանդիպմանն ասաց «Իրազեկ և պաշտպանված սպառող» հասարակական կազմակերպության նախագահ Բաբկեն Պիպոյանը:

Նա նշեց, որ վերջին ժամանակահատվածում, կարծես, լիազոր մարմինը՝ Սննդամթերքի անվտանգության պետական ծառայությունը, արձագանքել  էր հասարակական դաշտի կողմից արված աշխատանքներին և ինքն էլ մոնիթորինգ էր իրականացրել կաթնամթերքի  շուկայում:

«Ցավոք սրտի ասեմ, որ հաղորդագրությունով, որը տարածվեց  պատկան կառույցի կողմից, չտրվեցին այն հարցերի պատասախանները, որոնք, ըստ էության, կային, այլ իր բնույթով այնպես էր կազմված, որ ավելի շատ հարցեր առաջացրեց: Հաղորդագրությունում նշվել էր, որ ուսումնասիրվել է կաթնամթերքի շուկան և նշվել ընկերությունների անուններ, որոնցում հայտնաբերվել էին խախտումներ: Բայց հարցի պատասխանը չկար, թե որ ընկերության որ արտադրանքում է առկա խնդիր: Բացի այդ չկար որևէ խոշոր ընկերության անուն, այլ փոքր բիզնեսներն էին,  անհատ ձեռներեցներ, շատ հաճախ ոչինչ չասող անուններ: Բայց բոլորս էլ գիտակցում ենք, որ սպառման հիմնական ծավալները չէին ապահովելու  այդ ընկերությունները»- ասաց Բ. Պիպոյանը:

Նրա խոսքով՝ հատկապես այս ժամանակահատվածում իրականացրեցին մոնիթորինգ, որովհետև առջևում Ամանոր է  և այս կաթնամթերքներ էլ, որոնք սպառվելու են  քաղաքացիների կողմից,  ավելի երկար են պահվելու, քանի որ դեկտեմբերի 30-ից  արտադրությունները դադարում են,  հունվարի 5-6-ից  նոր վերսկսվելու են. «Կա դեռևս ժամանակահատված, որպեսզ խնդիրները լուծվեն»:

Բ. Պիպոյանը նշեց, որ որևէ մեկը չի ակնկալում, որ պետք է լիազոր մարմինը հասցնի ստուգում անցկացնի, տուգանքներ նշանակի, ոչ էլ կարծում է, որ կա դրա անհրաժեշտությունը:

«Ցավոք, մեր ստուգումների ընթացքում խոշոր խաղացողներից չգտնվեց որևէ  մեկը, որի արտադրանքում չհայտնաբերեցինք խախտում: Մեր հաղորդագրության մեջ նշել ենք: Կային  այս պահի դրությամբ այնպիսի ընկերություններ, որոնք այն ցուցանիշների նկատմամբ, որոնք մենք ստուգում ենք իրականացրել, խախտումներ չենք հայտնաբերել: Ինչո՞ւ չենք ներկայացրել այդ արտադրանքների անունները: Մենք արել ենք միայն ընտրանքային ցուցանիշներ, իսկ անվտանգության ցուցանիշներն ավելի մեծ են, հասարակական սեգմենտն  այդ հնարավորությունները չունի ամբողջ անվտանգության ցուցանիշների նկատմամբ  փորձաքննություն իրականացնի: Վերցերել ենք երեք-չորս անվտանգության ցուցանիշ և դրանով ունեցել ենք այդ քանակությամբ խախտումներ: Ինչ կլիներ, եթե ստուգեինք անվտանգության բոլոր ցուցանիշների մասով, չեմ կարող ասել»,- ասաց ՀԿ-ի նախագահը:

Նա շատ կարևորեց, որպեսզի այս ժամանակաշրջանում ստուգվի նաև հակաբիոտիկների առկայությունը, սակայն, Բ. Պիպոյանի խոսքով, դա բավականին թանկ է, հասարակական սեգմենտը չունի դրա հնարավորությունը, իսկ պետական կառույցն անպայման  պետք է ստուգի:

Նա նշեց, որ միայն տեղական արտադրության արտադրանքն են ստուգել, քանի որ Հայաստան ներմուծված որևէ կաթնամթերք մրցունակ չէ. «Մենք ստուգել ենք այն ընկերությունները, որոնց ընդհանուր ծածկույթը գերազանցում է 80-90 տոկոսը, որևէ ներմուծված ապրանք անգամ կես տոկոս չունի»:

«Ի՞նչ է պետք անել այս պահի դրությամբ: Գոնե Ամանորին ընդառաջ լիազոր մարմնի կողմից արտադրություններում իրականացվի  հսկողություն, հակառակ պարագայում աղեստամոքսային  տրակտի խանգարումները, հատկապես Ամանորին, երբ մի փոքր էլ չարաշահում ենք ալկոհոլային խմիչքները, անխուսափելի են»,- ասաց Բաբկեն Պիպոյանը:

Միաժամանակ  Բ. Պիպոյանն ընդգծեց, որ հայտնաբերված խախտումները ՝ աղիքային ցուպիկի խմբի մանրէներ, խմորասնկեր, առանձին դեպքերում բորբոսասնկեր,  կյանքին սպառնացող վտանգներ դժվար թե ունենան, սակայն առողջության ռիկս միանշանակ պարունակում են:

Հարցին, թե ո՞ւմ բացթողումների հետևանքով է այսօրվա այս վիճակը, Բ. Պիպոյանն ասաց, որ
արտադրողը պետք է ապահովի  անվտանգ արտադրություն, իսկ պետական մարմինը վերահսկի:

«Երբ որ չունենք նեղ պրոֆեսիոնալ մասնագիտական մոտեցում այս խնդիրների կարգավորման համար, պետական վերահսկողությունը, մեղմ ասած, միջինից մի քանի անգամ ցածր է, եթե չասեմ, որ ավելի շատ ձևական բնույթ է կրում, քան ինստիտուցիոնալ  բարեփոխումներ անելու, այլ բան ակնկակել մի փոքր ավելի բարդ է դառնում»,- ասաց «Իրազեկ և պաշտպանված սպառող» հասարակական կազմակերպության նախագահ Բաբկեն Պիպոյանը:

Նա տեղեկացրեց, որ երկուշաբթի փորձաքննութան ամբողջ պատասխանները հանձնելու են Սննդամթերքի անվտանգության պետական ծառայությունը, նաև առաջարկություններ են ներկայացնելու: