Ձեր վստահելի աղբյուրը

Թուրքիայում ՌԴ արտակարգ և լիազոր դեսպան Անդրեյ Կարլովը, ով այսօր Անկարայում ցուցահանդեսի բացման ժամանակ զինված հարձակման էր ենթարկվել և ծանր վիրավորում ստացել, մահացել է:  «Ռիա նովոստիի» հաղորդմամբ, այս մասին հայտնել է ՌԴ ԱԳՆ ներկայացուցիչ Մարիա Զախարովան:

ՌԴ ԱԳՆ ընդգծում է, որ տեղի ունեցածը համարում են ահաբեկչական ակտ:  

Հարձակման հետևանքով երեք մարդ է տուժել: Հարձակվողին վնասազերծել են:
Ականատեսը պատմել է, որ ցուցահանդեսում դեսպանը ելույթ էր ունենում, երբ նրա հետևում գոռացել են «Ալլահ ակբար» և ինչ-որ մեկը սկսել է կրակել:

Լուսանկարների ցուցահանդեսը կոչվում էր «Ռուսաստանը թուրքերի աչքերով»:

ՏԱՍՍ-ը, հղում անելով HaberTurk-ին, գրում է, որ դեսպանի վրա հարձակված  տղամարդը ոստիկանության նախկին աշխատակից Մևլութ Մերտ Ալտինտաշն է, ով ազատվել է աշխատանքից այս տարվա հուլիսի 15-ին երկրում զինված հեղաշրջման փորձի հետաքննության շրջանակում:

Ըստ այս աղբյուրի, 22 –ամյա տղամարդը եղել է ՖԵՏՕ ահաբեկչական կազմակերպության անդամ:  

Հետաքրքիր է, որ NTV հեռուստաալիքը հաղորդել էր, թե տղամարդը  որպես ոստիկան մտել ցուցահանդես:   Հարձակվողը սպանվել է, նրա մոտ հայտնաբերվել է ոստիկանական վկայական: