Ձեր վստահելի աղբյուրը

«Երրորդ Հանրապետություն» կուսակցությունը լայն կոնսոլիդացիայի կողմնակիցն է և մենք կարծում ենք, որ միայն դրա միջոցով է հանրավարո հասնել իշխանափոխության: Այդ մասին այսօր լրագրողների հետ հանդիպման ժամանակ հայտարարեց ՀՀ նախագահի աշխատակազմի ղեկավարի նախկին տեղակալ, այժմ «Երրորդ Հանրապետություն» կուսակցության փոխնախագահ Վիկտոր Դալլաքյանը:

Եվ որպես «լայն կոնսոլիդացիայի» օրինակ կամ նախադեպ, Դալլաքյանը հիշեց 1990 թվականի Գերագույն խորհրդի ընտրությունները, որի արդյունքում Հայաստանում մեկ անգամ իրականացվել է խաղաղ իշխանափոխություն:

Անդրադառնալով ընտրություններից առաջ ստեղծված Քաղաքացիական պայմանագիր-Լուսավոր Հայաստան-Հանրապետություն դաշինքին, Դալլաքյանն ասաց, որ դա իր բնույթով նեղ դաշինք է և համագործակցության շրջանակը փոքր է, մինչդեռ ինքը և «Երրորդ Հանրապետությունը» համաժողովրդական համագործակցության կողմնակից են:

Ինչ վերաբերում է մամուլում ներկայացվող մյուս՝ Րաֆֆի Հովհաննիսյան-Սեյրան Օհանյան-Վարդան Օսկանյան հնարավոր դաշինքին, ապա Դալլաքյանն ասաց, որ ինքը տարբեր կուսակցությունների ղեկավարների հետ հանդիպումներ ունեցել է: Բայց նա կանգ առավ Սեյրան Օհանյանի հետ հանդիպման վրա: Ասաց, որ իր հրաժարականից հետո հանդիպում է ունեցել Սեյրան Օհանյանի հետ, քննարկել ստեղծված Հայաստանում ստեղծված իրավիճակը:

«Մենք Հայաստանում ստեղծված իրավիճակը գնահատում ենք նույն ձևով: Նույն ձևով ենք գնահատում նաև ստեղծված իրավիճակից դուրս գալու ելքերը: Ձեզ կարող եմ ասել, որ առաջիկա օրերին Սեյրան Օհանյանը հանդես կգա հայտարարությամբ ու կհայտարարի իր մուտքը քաղաքականություն: Այսօր ես ձեզ ասում եմ, որ ես տեղյակ եմ նրա ծրագրերին, մենք դրանք քննարկում ենք միասին, պարբերաբար ու առաջիկայում նա այդ մասին հայտարարությամբ հանդես կգա», -հայտարարեց Վիկտոր Դալլաքյանը:

Լրագրողը հետաքրքրվեց, թե ի՞նչ լայն կոնսոլիդացիայի մասին է խոսքը, ո՞ր ուժերի հետ է համագործակցելու Դալլաքյանը և իր կուսակցությունը, քաղաքական գործիչն ի պատասխան նկատեց, որ առաջիկայում այդ մասին կհայտարարվի:

Եթե Դալլաքյանը հայտարարում է, որ իրենք լայն կոնսոլիդացիայի կողմնակիցն են, հնարավո՞ր է համագործակցեն Հայ Ազգային կոնգրես կուսակցության հետ, քանի որ Լևոն Տեր-Պետրոսյանն էլ համագումարում այդ մասին առաջինը հայտարարություն արեց հարցին, քաղաքական գործիչը հստակ պատասխան չտվեց, ուղղակի ասաց, որ կհամագործակցեն այն ուժերի հետ, որոնք խորհրդարանական ընտրությունների միջոցով Հայաստանում իշխանափոխություն իրականացնելու խնդիր են դնում:

Նա տեղեկացրեց, որ դեկտեմբերի 23-ին կայանալիք «Երրորդ Հանրապետություն»  կուսակցության արտահերթ 7-րդ համագումարում կքննարկեն կուսակցության նոր կանոնադրությունը, 50 էջից կազմված ծրագրի ընդունումը, որտեղ ներկայացվելու են երկրի ներքին ու արտաքին քաղաքական հարցերը:

Դալլաքյանն ասաց, որ յալ կուսակցությունների ներկայացուցիչների չեն հրավիրել իրենց համագումարին, քանի որ դա ներկուսակցական համագումար է լինելու:

Բայց նաև ասաց, որ կբացի փակագծեր. «Եթե մեզ հաջողվի հասնել լայն համագործակցության և դրա շրջանակներում ձևավորել որոշակի դաշինքային հարաբերություններ, ապա այդ հարաբերություններին կարող են մասնակցել և հայտնի կուսակցություններ, և հայտնի քաղաքական, ռազմական գործիչներ, որոնք կարող են նաև գլխավորել այդ դաշինքի ցուցակը՝ լինելով անկուսակցական»: