Ձեր վստահելի աղբյուրը

Եվրոպայի կրկնակի չեմպիոն, կանանց 75 կգ քաշային կարգի Լոնդոնի Օլիմպիական խաղերի բրոնզե մեդալակիր, ծանրորդուհի Հռիփսիմե Խուրշուդյանն ամանորին պատրաստվում է ավանդական հայ ընտանիքների նման: Տոնածառը դեռ չեն հասցրել դնել, սակայն որդին` Աշոտը, անհամբեր սպասում է Ձմեռ պապիկի գալուն:

Panorama.am-ի հետ զրույցում Հռիփսիմեն նաև ամփոփեց տարին` գնահատելով այն իր լավ և վատ կողմերով: Ոչ դոպինգ-սկանդալների հետ կապված վերջին իրադարձությունները, ոչ էլ Ռիոյի Օլիմպիական խաղերին չմասնակցելը ստվեր չեն գցել ընդհանուր տարվա վրա և հայ ծանրորդուհին այն գնահատում է գերազանց` հաշվի առնելով մարզական առումով պատմական իրադարձությունները:

Հռիփսիմե Խուրշուդյան.- Ընդհանուր տարին գնահատում եմ գերազանց, քանի որ մենք ձեռք բերեցինք Օլիմպիական չեմպիոն` ի դեմս Արթուր Ալեքսանյանի: Մյուս տղաները` Միհրանը, Գոռը, Սիմոնը բարձր պահեցին մեր հայ ազգի պատիվը: Այդքանը բավական է փաստելու համար, որ 2016-ն իսկապես հիանալի տարի էր:

Panorama.am.- Ինչպե՞ս և որտե՞ղ եք դիմավորելու նոր տարին: Ունե՞ք հատուկ ավանդույթներ:

Հռիփսիմե Խուրշուդյան.- Արդեն մեկ տարի է տեղափոխվել եմ նոր բնակարան և բոլոր հայ ընտանիքների նման ամուսնուս և բալիկիս հետ միասին նոր տարին կդիմավորենք տանը: Իսկ հունվարի 1-ին, կրկին կհետևենք այն ավանդույթին, երբ ընկնում են դռնեդուռ` հարևաններին, բարեկամներին շնորհավորելու համար:

Panorama.am.- Տոնածառը դրե՞լ եք:

Հռիփսիմե Խուրշուդյան.- Դեռ ոչ: Տոնածառը պետք է վաղը դնենք, բայց արդեն որոշ բաներ պատրաստել ենք: Բուխարի ու տնակ եմ պատրաստել իմ ձեռքով, որպեսզի տղայիս` Աշոտի համար հետաքրքիր լինի, իսկ եղևնին` վաղը:

Panorama.am.- Ձմեռ պապիկին Աշոտը նամակ գրե՞լ է:

Հռիփսիմե Խուրշուդյան.- Ձմեռ Պապիկին նամակ գրել ենք դեռևս դեկտեմբերի 1-ին: Աշոտիկը շատ հետաքրքրված է, ամեն օր սպասում է, թե Ձմեռ պապին երբ հյուր կգա, որպեսզի իրեն նվեր տա: Ամեն առավոտ արթնանում ու հարցնում է, թե «ձյունը եկել է, բայց Ձմեռ պապը չկա»: Ես բացատրում եմ, որ նա հեռու վայրից է ժամանում: Անհամբեր սպասում է:

Panorama.am.- Հռիփսիմե, ո՞րն ես համարում 2016 թ. քո լավագույն ձեռբերումը:

Հռիփսիմե Խուրշուդյան.- 2016 թ. իմ լավագույն ձեռքբերումը համարում եմ Եվրոպայի կրկնակի չեմպիոն դառնալս և այն, որ առաջին անգամ պատմության մեջ Հայաստանի աղջիկների ծանրամարտի հավաքական թիմը դարձավ ուժեղագույնը Եվրոպայում:

Panorama.am.- Իսկ տարվա ձախողումը…

Հռիփսիմե Խուրշուդյան.- Այն, որ չկարողացա մասնակցել Ռիոյի Օլիմպիական խաղերին: Դա ինձ համար ամենավատ իրադարձությունն էր: Տարին ինձ համար այսպիսինն էր` իր լավ և վատ կողմերով:

Panorama.am.- 2017 թ. գլխավոր նպատակդ ո՞րն է:

Հռիփսիմե Խուրշուդյան.- 2017 թ. հուսամ, որ Աստված իմ կողմից կլինի, կվերադառնամ մեծ սպորտ և կրկին կկարողանամ հաղթանակներ պարգևել և իմ հաջողություններով ուրախացնել իմ հայությանը:

Զրուցեց՝  Հռիփսիմե Ղազարյանը

Այսօր Հայաստանի մարզական լրագրողների հանրապետական ֆեդերացիան ամփոփել է 2016 թ. մրցաշրջանի Հայաստանի լավագույն մարզիկների տասնյակը, որտեղ Հռիփսիմե Խուրշուդյանը տեղ է զբաղեցրել 8-րդ հորիզոնականում: