Ձեր վստահելի աղբյուրը

«Հայաստանի և Իրանի միջև այսօր ստորագրվելիք փաստաթղթերը, ձեռք բերված պայմանավորվածությունները նոր լիցք կհաղորդեն հայ-իրանական փոխգործակցությունն որակապես նոր մակարդակի բարձրացնելուն»,- ՀՀ նախագահի նստավայրում հայ-իրանական բարձր մակարդակի բանակցությունների ավարտից հետո մամուլի համար հայտարարության ժամանակ ասաց  ՀՀ նախագահ Սերժ Սարգսյանը: 

«Մենք այսօր համակողմանի և բովանդակային քննարկումներ ունեցանք երկկողմ օրակարգի ամենատարբեր հարցերի շուրջ, վերահաստատեցինք մշակված ծրագրերի համատեղ իրականացմանն ուղղված մեր հանձնառությունը, կարևորեցինք քաղաքական խորհրդատվությունների պարբերական անցկացումը, քննարկեցինք առևտրատնտեսական, էներգետիկայի, տրանսպորտի, գյուղատնտեսության, կրթության, առողջապահության, մշակույթի, գործարար շրջանակների միջև կապերի խթանման հետ կապված հարցեր»,- նշեց ՀՀ նախագահը:

Սերժ Սարգսյանն ասաց, որ խորին երախտագիտություն է հայտնել իր  գործընկերոջը հայկական մշակութային ժառանգության նկատմամբ Իրանի ընդգծված հարգանքի և հոգածության, ինչպես նաև Իրանի հայ համայնքի հանդեպ ավանդական հոգատար վերաբերմունքի համար:

Հանդիպմանն անդրադարձ է եղել նաև տարածաշրջանային, միջազգային հրատապ խնդիրներին:

«Մտքեր ենք փոխանակել Իրանի միջուկային ծրագրի շուրջ ձեռք բերված պատմական համաձայնությունների իրագործման վերաբերյալ: Վստահ եմ, որ դրանք Իրանի աշխատասեր, ստեղծագործ ժողովրդի առջև զարգացման նոր հորիզոններ կբացեն՝ նոր խթան հանդիսանելով ինչպես մեր երկկողմն, այնպես էլ տարածաշրջային առավել լայն փոխգործակցության  աշխուժացման համար»,- ասաց Սերժ Սարգսյանը:

Նախագահը տեղեկացրեց, որ քննարկել են նաև իրավիճակը Մերձավոր Արևելքում,  ահաբեկչության դեմ պայքարը,  իրավիճակի կարգավորմանն ուղղված միջազգային ջանքերը:

«Այս առումով կարևոր է երկու օր առաջ ՄԱԿ-ի Անվտանգության խորհրդում Հալեպի հումանիտար իրավիճակի շուրջ բանաձևի ընդունումը: Անշուշտ, Հայաստանին առաջին հերթին մտահոգում է  Սիրիայում, հատկապես Հալեպում հայ համայնքի անվտանգության ապահովման խնդիրը»,- ասաց ՀՀ նախագահը:

Սերժ Սարգսյանն իր խոսքում նաև նշեց. «Մեծ պատիվ է Հայաստանում հյուընկալել հարևան և բարեկամ Իրանի  նախագահ և իմ շատ լավ գործընկեր Հասան Ռոհանիին:

Անհնարին է  փոխանցել Հայաստան-Իրան հարաբերությունների ողջ  խորությունը, ընդգրկվածությունը, դրանք սոսկ բարեկամական բնութագրելով: Սակավաթիվ են այն ժողովուրդները, որոնց պատմության քառուղիներում վիճակված է եղել հազարամյակներով քայլել կողք կողքի և այսօր էլ շարունակել սերտ փոխգործակցությունն՝ առանձնահատուկ հարգանք տածելով միմյանց մշակույթի հանդեպ: Հայաստանը, համոզված եմ նաև Իրանը, շահագրգռված են անելու  առավելագույնն ավանդական հարուստ կապերի վրա խարխսված բարեկանական հարաբերություններն ավելի ամրապնդելու և զարգացնելու ուղղությամբ: Դրա վկայությունն է անկախությունից ի վեր  Իրանի հետ մեր հարաբերությունների բարձր մակարդակը, համատեղ ծրագրերը, աշխույժ փոխայցերը, իմ գործընկերոջ  ներկա այցը մեր երկիր:

Իրանցի գործընկերոջս հետ պայմանավորվել ենք շարունակել ամենաբարձր մակարդակով շփումները: Ես շնորհակալություն հայտնեցի Իրանի նախագահին՝ հաջորդ տարի Իրանի Իսլամական Հանրապետություն հրավերի համար: Ասացի, որ հաճույքով անպայման կգամ,  որովհետև մեր հարաբերություններն ուղղակի պարտավորեցնում են»: