Ձեր վստահելի աղբյուրը

ՍԱՊԾ բուսասանիտարիայի տեսչության պետ Արթուր Նիկոյանն այսօր լրագրողների հետ հանդիպմանն ամփոփելով տարին՝ տեղեկացրեց, որ 2016 թվականին հանրապետությունում նմուշառվել է մոտ 6 հազար տեսակի մշակաբույս, այնուհետև ներկայացվել բուսասանիտարական լաբորատոր փորձաքննության:

«Ստացվելիք բոլոր հաշվետվությունների արդյունքները մինչև 2017 թվականի փետրվարի սկիզբը պետք է ուղարկվեն առևտրային գործընկեր երկրներին, որպեսզի արգելանք չդրվի մեր երկրից արտահանվող պտուղ-բանաջեղենի վրա»,-ասաց նա:

Արթուր Նիկոյանն առանձնացրեց հայկական կոնյակի վարկանիշի բարձրացմանը վերաբերող այս տարվա աշխատանքները. «Այս տարի Հայաստան են ներմուծվել կոնյակի հումքի որակի վերահսկողության հատուկ սարքավորումներ: Որոշվել է ստեղծել յուրահատուկ սորտերի իզոտոպային բանկ: Հետազոտվել են 20300 տնտեսվարողներիn պատկանող 10700 հա խաղողի այգիներ՝ ըստ սորտերի: Նախատեսվում է, որ 2017 թվականին խաղողի հասունացման շրջանում մենք կկատարենք նմուշառում բերքից, ըստ սորտերի կպատրաստենք խաղողի գինենյութ և այն կներմուծենք իզոտոպային բանկ»:

Նրա խոսքով՝ ծառայությունն ակտիվ համագործակցում է ԵԱՏՄ երկրների հետ. «Գիտենք, որ ԵԱՏՄ-ն, որպես միավորում երիտասարդ է, և շատ իրավական ակտեր նոր են ընդունվում, կազմվում են նախագծեր, իրավական ակտեր: Մենք ակտիվ մասնակցել ենք դրանց և շատ առաջարկություններ ենք ներկայացրել, որոնք բխում են մեր երկրի տնտեսական շահերից ու սանիտարական անվտանգությունից»: