Ձեր վստահելի աղբյուրը

«Մեզ համար Հայաստանն ու Ադրբեջանը բարեկամ երկրներ են: Հուսով ենք, որ ականատեսը կլինենք տարածաշրջանում կայուն խաղաղությանը, որը կլինի ամբողջ տարածաշրջանի օգտին»,- ՀՀ նախագահի նստավայրում հայ-իրանական բարձր մակարդակի բանակցությունների ավարտից հետո մամուլի համար հայտարարության ժամանակ ասաց Իրանի նախագահ Հասան Ռոհանին:

Նրա խոսքով՝ անկասկած, Լեռնային Ղարաբաղի հակամարտության խնդիրը ռազմական լուծում չունի, և կուզենային ականատեսը լինել խաղաղ ճանապարհով հարցի կարգավորմանը:

Հասան Ռոհանին նշեց, որ ՀՀ նախագահի հետ հանդիպմանը խիստ կարևոր անդրադարձ է կատարվել նաև տարածաշրջանային անվտանգության խնդիրներին:

«Երկու երկրներն էլ տարածաշրջանային անվտանգության առումով ունեն որոշակի գործադրված ջանքեր:  Պետք է բոլոր երկրների հետ մենք կարողանանք տվյալ ոլորտում ունենալ փոխգործակցություն, որպեսզի ահաբեկչության դեմ պայքարում ունենանք արդյունավետ ձեռնարկված քայլեր»,- ասաց Իրանի նախագահը:

Հ. Ռոհանիի խոսքով՝  Իրաքն և Սիրիան այսօր գտնվում են ահաբեկչության հիմնախնդրի առջև, և այն հումանիտար խնդիրները, որոնք այսօր տարածաշրջանում առկա են, պետք է փոխհամաձայնությամբ ներկայացվեն, որպեսզի կարողանան տվյալ հարցում ևս ունենալ արդյունավետ փոխգործակցություն: