Ձեր վստահելի աղբյուրը

2016 թ. ընթացքում պետական գույքի օտարումից ստացված միջոցները կազմել են  6 մլրդ 859 մլն դրամ, ինչը  2015 թ-ի համեմատ ավելացել է  4 մլրդ 422 մլն դրամով: Այս մասին այսօր տարեվերջյան ամփոփիչ ասուլիսում ասաց ՀՀ կառավարությանն առընթեր պետական գույքի կառավարման վարչության պետ Արման Սահակյանը:

Նրա խոսքերով՝ այս տարի պետական գույքի մասնավորեցումից ստացված միջոցները կազմել են շուրջ 50 մլն դրամ, իսկ գույքի վարձակալությունից՝ դեկտեմբերի 15-ի դրությամբ, փաստացի պետական բյուջե է մուտքագրվել 221 մլն 227 հազ. դրամ՝ նախատեսված 192 մլն 400 հազարի փոխարեն:

«Պետական սեփականություն հանդիսացող շենք-շինությունների տանիքներին ու ձեղնահարկերում կապի սարքավորումների  տեղակայման  և սպասարկման պայմանագրերից փաստացի մուտքագրվել է  83 մլն 944 հազ. դրամ: Անցած տարի փաստացի մուտքագրվել էր 61 մլն  871 հազ. դրամ, որն այս տարի գերազանցվել է 36%-ով»,- ասաց Արման Սահակյանը:

Ներկայացնելով այլ տվյալներ՝ Պետգույքի վարչության պետն ասաց, որ պետական սեփականություն համարվող հողերի կադաստրային արժեքի վճարումից մուտքերը 2016-ին կազմել են 38 մլն 578 հազար դրամ: Այսպիսով, օտարումից, մասնավորեցումից, վարձակալութունից, կապի սարքավորումների տեղակայումից ու  հողի կադաստրային արժեքի  մուտքերից ստացված դրամական միջոցները 2016-ին կազմել են 7 մլրդ 252 մլն դրամ, որից պետական բյուջե է փոխանցվել 4 մլրդ 477 մլն  դրամ, համայնքային բյուջեներ՝  2 մլրդ 711 մլն 629 հազ. դրամ, ՊՈԱԿ-ների բյուջեներ՝ 64մլն 103 հազ. դրամ:

Արման Սահակյանը տեղեկացրեց, որ 2016 թվականին Վարչության ենթակայությամբ եղել է 26 ընկերություն, որից 2-ը գտնվում է սնանկացման, 1-ը՝ լուծարման գործընթացում, 1 ընկերություն վերակազմակերպվել է: 2016թ. ընթացքում   10 ընկերության  մասնավորեցման և 2 ընկերության լուծարման նպատակով ներկայացվել են գնահատման համար անհրաժեշտ ելակետային տվյալների փաթեթներ, 1 ընկերության մասնավորեցում է նախապատրաստվել:

Ըստ նրա՝  այս տարի իրականացվել է  նաև պետական մասնակցությամբ 194 առևտրային կազմակերպությունների ֆինանսատնտեսական վիճակի դիտարկում և վերլուծություն:
        
Անդրադառնալով լուծարման ենթակա կազմակերպություններին՝ Արման Սահակյանն ասաց, որ այսօրվա  դրությամբ լուծարման գործընթացում է 22 կազմակերպություն: Այս տարի  լուծարվող կազմակերպություններում մարվել է շուրջ 52 մլն 629 հազ. դրամ կրեդիտորական պարտք: Իսկ վերջին  տարիներին լուծարման դաշտի կանոնակարգման արդյունքում մարվել է շուրջ 390 մլն կրեդիտորական  պարտք՝ կուտակված հիմնականում աշխատավարձերի և պետբյուջեի գծով: «Դաշտը մաքրվում է, աստիճանաբար նվազում են նաև կրեդիտորական պարտքերը»,- նշեց նա:

Նրա խոսքերով՝ 2016թ. ընթացքում պետական գույքի հաշվառման բազայում վերահաշվառվել է  պետական սեփականություն հանդիսացող 8548 միավոր անշարժ գույք (ընդհանուր մակերեսը՝ 8 մլն  . քառ/մետր: Այս տարի հաշվառված անշարժ գույքն ավելացել է 566 միավորով:

Արման Սահակյանը կարևորեց հանրակացարանների հետ կապված խնդիրները: Մասնավորապես, այս տարվա  ընթացքում  կառավարության որոշումներով՝ բռնագաղթած և Հայաստանի քաղաքացիություն ստացած 14 ընտանիքի սեփականաշնորհվել են իրենց զբաղեցրած բնակելի տարածքները, տեղաբնակ 44 ընտանիքի նվիրատվությամբ հատկացվել  են իրենց սենյակները: 2011 թվականից առայսօր մայրաքաղաքի և մարզերի հանրակացարաններում բնակվող 366 ընտանիքի սեփականության խնդիր է լուծվել, որից 253-ը` նվիրատվության, 113-ը` սեփականաշնորհման ճանապարհով: Շահառուները  913-ն են, նրանց հատկացված սենյակների թիվը՝ 407:

Խոսելով Վարչության Աճուրդի կենտրոնում այս տարի իրականացված գործարքներից՝ Պետգույքի վարչության պետն ասաց, որ կենտրոնում վաճառքի է ներկայացվել 1324 լոտ, որից 514-ը՝ տրանսպորտային միջոց, 42-ը՝ լուծարվող ընկերությունների գույք, 766-ը՝ այլ  շարժական գույք, 1-ը՝ մասնավորեցման ենթակա գույք: Ներկայացված լոտերից վաճառվել է 687 լոտ, որից՝ 225-ը՝ տրանսպորտային միջոց, 451-ը՝ այլ  շարժական գույք, 11-ը՝  լուծարվող ընկերությունների գույք:

«Վաճառված տրանսպորտային միջոցների կատարման տոկոսը 2015 թվականի համեմատ աճել է  31 %-ով և կազմում է 53%: Սա կարևոր ցուցանիշ է և խոսում է աճուրդային մրցակցային պայմանների բարելավման մասին»,- ընդգծեց Արման Սահակյանը:

Նա նաև նշեց, որ այս տարի  մասնավորեցման,  օտարման, անհատույց օգտագործման, վարձակալության, նվիրաբերության և այլ  պայմանագրերով պարտավորություն է ստանձնել   60 գնորդ, ներդրումային պարտավորությունները նախատեսված էին 507 մլն 545 հազ. դրամի և 1 մլն 370 հազ. ԱՄՆ դոլարի չափով: Արդեն իսկ  կատարված է 424 մլն 589 հազ. դրամի չափով ներդրում, կատարման  ժամկետը ուժի մեջ է: Մեկ գնորդի նկատմամբ 60 հազար դոլարի տուգանք է հաշվարկվել: 

«2016 թվականին հարուցված դատական հայցերի ու բանակցությունների արդյունքում  պետական բյուջե է վերադարձվել 18 մլն 844 հազար դրամ, որից՝ 15 մլն 462 հազ. դրամ՝ մասնավորեցման, 3 մլն 381 հազ. դրամ վարձակալական գործերով»,- նշեց Արման Սահակյանը:

Անդրադառնալով 2017թ-ի ծրագրերին՝ Պետական գույքի վարչության պետն ասաց, որ նախապատրաստում են մի քանի օրենսդրական փոփոխություններ,  առաջիկայում պետական գույքի մասնավորեցման նոր ծրագիր կկազմվի` նոր ընկերություններ ընդգրկելու նպատակով: «Ծրագրային մասնավորեցումը   նոր ներդրումների ներգրավման և աշխատատեղերի ստեղծման հնարավորություն կընձեռի»,- ընդգծեց Արման Սահակյանը: