Ձեր վստահելի աղբյուրը

Չնայած ամիսներ առաջ Ադրբեջանական Հանրապետության խորհրդարանում հնչած սպառնալիքներին, թե ՒԻՀ նախագահի՝ Հայաստան այցելության դեպքում ԱՀ նախագահ Իլհամ Ալիևը կայցելի Իսրայել, այսօր պաշտոնական այցով Երևան է ժամանել ԻԻՀ նախագահ Հասան Ռոհանին:

«Այցը պատմական է, քանի որ սպասվում է Իրան-Հայաստան հարաբերություններում համագործակցության սկիզբ արդեն նոր ոլորտներում, մասնավորապես, խոսքը գնում է անվտանգության ոլորտի մասին», - Panorama.am-ի հետ զրույցում նման կարծիք հայտնեց իրանագետ Արտյոմ Տոնոյանը:

«Այս տարածաշրջանում Իրանը և Հայաստանը միմյանց համար ունեն հավասար ռազմավարական նշանակություն, քանի որ Հայաստանն իրականացնում է Իրանի հյուսիսային հատվածները պանթյուրքիստական հոսանքների ներթափանցումից պաշտպանող գործառույթ՝ պարպելով ԱՀ ռազմական և տեղեկատվական ռեսուրսները, իսկ Իրանն էլ իր հերթին անվտանգ է պահում Հայաստանը Մերձավոր Արևելքից փչող վտանգներից և ահաբեկչական քամիներից», - ասաց նա:

Ըստ իրանագետի՝ Հասան Ռոհանիի այցը Հայաստան համընկել է մի շրջանի հետ, երբ Ադրբեջանը թիկունքից նոր հարված է հասցրել Իրանին՝ Բաքվում հյուրընկալելով ԻԻՀ ոխերիմ թշնամի համարվող Իսրայելի վարչապետին և  մտնելով Իսրայելի հետ նոր ռազմական համագործակցության մեջ, որն ուղղված է նաև Իրանի դեմ:

Տոնոյանի խոսքերով՝ Իրանում համարում են, որ Իսրայելի ռազմական ներկայությունը Ադրբեջանում անթույլատրելի է, և ԼՂ հակամարտության պատրվակով Ադրբեջանում հայտնվող իսրայելական ցանկացած զենք դիտարկում են Իրանի դեմ դրանց կիրառելիության հնարավորության համատեքստում:

«Հետևաբար, Հ. Ռուհանիի այցը Երևան այսօր, երբ ընդամենն օրեր առաջ Իսրայելի և Ադրբեջանի միջև տեղի է ունեցել մի շարք նոր ոլորտներում համագործակցության սերտացում Բաքվում Իսրայելի վարչապետի անմիջական ներկայությամբ, պատմական բացառիկ  հնարավորություն է մեզ համար հայ-իրանական հարաբերությունների կարևորությունն ավելի ընդգծելու և Իրանի հետ համատեղ  տարածաշրջանային անվտանգության ապահովմանն ուղղված երկկողմ սերտ համագործակցությունների նոր փաթեթի ստեղծման համար», - եզրափակեց իրանագետ Ա. Տոնոյանը: