Ձեր վստահելի աղբյուրը

ՀՀ ԳՆ սննդամթերքի անվտանգության պետական ծառայության կողմից վերջին երեք ամիսների ընթացքում իրականացվել է 120 պետական վերահսկողություն՝ հիմնականում կաթ-կաթնամթերք, միս-մսամթերք արտադրող ընկերություններում, ալկոհոլային և ոչ ալկոհոլային խմիչքների արտադրությամբ զբաղվող ընկերությունների մոտ, ինչպես նաև հանրային սննդիր ու իրացման ցանցերի ոլորտում: Այսօր լրագրողների հետ հանդիպմանը տեղեկացրեց ՍԱՊԾ սննդամթերքի անվտանգության և որակի հսկողության տեսչության պետ Վահե Դանիելյանը՝ նշելով, որ ընդհանուր տարվա կտրվածքով իրականացվել է ավելի քան 1020 պետական վերահսկողություն:

«Դրանց արդյունքներով արձանագրվել են անհամապատասխանություններ սննդամթերքի անվտանգության բնագավառը կարգավորող օրենսդրության պահանջների՝ պիտանելիության ժամկետն անցած սննդամթերքի վաճառքի դեպքեր, մակնշման,  հիգիենայի անհամապատասխանության դեպքեր, բոլոր դեպքերով տրվել են հստակ հանձնարարականներ և հետևողական ենք դրանց կատարմանը: Հայտնաբերված թերությունները չշտկած ընկերությունների գործունեությունը կասեցվել է, ոմանց արտադրանքը հանվել է շրջանառությունից և ոչնչացվել»:

Թե, որ ընկերությունների մասին է հատկապես խոսքը, Վահե Դանիելյանը չցանկացավ անուններ նշել, ասելով՝ ցանկին կարելի է ծանոթանալ ՍԱՊԾ կայքում:

Նրա խոսքով՝ տնտեսվարող սուբյեկտներին տրվում է նաև անհրաժեշտ խորհրդատվություն՝ առկա խախտումները վերացնելու համար:

«Նախատոնական և հետտոնական խիստ վերահսկողություն է իրականացվելու սննդամթերքի իրացման շուկայում, հստակ գրաֆիկով հերթապահություն է սահմանվում դեկտեմբերի 23-ից մինչև hունվարի 8-ը՝ ամենօրյա շրջայցերով: 20-60-40 հեռախոսահամարով թեժ գիծն էլ աշխատելու է շուրջօրյա ռեժիմով»,-տեղեկացրեց պաշտոնյան:

Նա հավելեց նաև, սննդամթերք տեղափոխող բոլոր ավտոմեքենաներն այսուհետ պետք է պարտադիր կարգով սանիտարական անձնագիր ունենան:

Ինչ վերաբերում է Թուրքիայից ՀՀ ներկրվող բոլոր սննդատեսակներին, նա ասաց, որ դրանք ենթարկվում են մանրակրկիտ լաբորատոր փորձաքննության: