Ձեր վստահելի աղբյուրը

Համահայկական  սիմֆոնիկ նվագախումբն այլևս իրականություն է: Նվագախումբը ստեղծելու հիմքում միասնության գաղափարն է, որպեսզի կարողանանք մեկ նվագախմբի, մեկ երաժշտության շուրջ համախմբել աշխարհով մեկ սփռված հայ երաժիշտներին,- լրագրողների հետ հանդիպմանն ասաց մշակույթի նախարար Արմեն Ամիրյանը: 

Համահայկական նվագախումբը կղեկավարի երեք դիրիժոր՝ Էդուարդ Թոփչյանը, Սերգեյ Սմբատյանը և Կարեն Դուրգարյանը: Այս որոշումը, նախարարի խոսքով, նույնպես բխում է միասնության գաղափարից։

Ա.Ամիրյանը նշեց, որ առաջին համերգը կայանալու է ապրիլի 24-ին կամ նախորդող օրը, այնուհետև համերգներ կլինեն հայաշատ գաղթօջախներում՝ Բուենոս Այրես, Լոս Անջելես, Նյու Յորք, Փարիզ, Լիբանան, Բեյրութ, Թեհրան և այլուր:

«Նվագախմբի կազմը մշտապես  փոփոխական է լինելու, երաժիշտները հավաքվելու են մեկ համերգի համար, նվագելու են, հետո յուրաքանչյուրը գնալու է իր գործին»,- ասաց նա:

Ա.Ամիրյանի խոսքով՝ նվագախումբը կատարելու է հայ կոմպոզիտորների գործեր՝ Կոմիտասից մինչև ժամանակակից ստեղծագործողներ:

«Պատվեր ունենք ձևակերպված Տիգրան Մանսուրյանին, որպեսզի գրի 8-10 րոպեանոց ստեղծագործություն՝  նվիրված ապրիլյան պատերազմի հերոսներին: Կարծում եմ՝ հենց այդ հերոսականությամբ կարելի է եզրափակել ապրիլքսանչորսյան համերգը»,- նշեց նախարարը:

Նվագախմբի աշխատանքները համակարգում է Հայաստանի ազգային ֆիլհարմոնիկ նվագախմբի տնօրեն Ռուզաննա Սիրունյանը: Նա ասաց, որ շուրջ երկու տասնյակ երկրից ստացել են հայտեր:

«Արդեն  50 մասնակցից հայտ ենք ստացել, ովքեր ցանկություն են հայտնել հանդես գալ նվագախմբի կազմում: Նվագախմբի երաժիշտների հարցը շուրջ 70 տոկոսով լուծված է, այս պահին փորձում ենք լուծել մենակատարների հետ կապված խնդիրները: Իհարկե, այս կարճ ժամանակահատվածում տարբեր երկրներում ապրող հայ երաժիշտներին համախմբելը դժվար է, որովհետև յուրաքանչյուրն ունի իր ծրագրերը, սակայն երբ լսում են գաղափարի մասին,  արձագանքում են: Եթե առաջին համերգին չկարողանան մասնակցել, անպայման հաջորդ համերգներին արդեն ներկա կլինեն»,- նշեց նա: