Ձեր վստահելի աղբյուրը

«Երրորդ հանրապետություն» կուսակցության օրագիրը, որը այսօր արտահերթ 7-րդ համագումարում ներկայացրեց Վիկտոր Դալլաքյանը, կազմված է շուրջ 50 էջից: Դրանում տեղ են գտել երկրի տարբեր լորոտներին վերաբերող դրույթներ՝ փոքր ու միջին բիզնես, գյուղատնտեսություն, գործազրկություն, արտաքին հարաբերություններ:

Դալլաքյանի փոխանցմամբ, իրենց նպատակն է Հայաստանը դաձնել ժամանակակից, մրցունակ ու կենսունակ պետություն, աջակցել Ղարաբաղի միջազգային ճանաչմանը, իրականացնել Հայաստանի ապաշրջափակմանն ուղված քաղաքական, տնտեսական ծրագրեր:

Հայաստանը, Դալլաքյանի խոսքով, համատարած ձախողման արդյունքում հայտնվել է ոչ միայն պետականության կորստյան, այլև հայրենիքի կորստյան իրական վտանգի առջև:

«Մենք այսօր գործ ունենք սովորական արտագաղթի, այլ գյուղացիությանը, նոր մտավորականության էլիտար շերտին, ինտելեկտուալներին և գործարար խավին պարտադրվող հեռացման, այսինքն՝ Հայաստանի փաստացի կազմաքանդման գործընթացի հետ», -հայտարարեց Դալլաքյանը՝ ընդգծելով, որ զանգվածային արտագաղթը ազգային անվտանգության սպառնացող մեծ վտանգ է դարձել:

Ներկայացնելով արցախյան հիմնախնդրի լուծման հարցում կուսակցության դիրքորոշումը, Դալլաքյանը տեղեկացրեց, որ իրենք հանդես են գալիս Արցախի ինքնորոշման իրավունքի պաշտպանության և միջազգային ճանաչման գործընթացի իրականացման, Արցախի հիմնախնդրի խաղաղ, քաղաքական, բանակցային ճանապարհով լուծման դիրքերից:

Ըստ Դալլաքյանի, հակամարտության լուծմանը պետք է համաձայնություն տա Արցախի ժողովուրդը:

«Բանակցային գործընթացում Արցախի՝ լիիրավ կողմ հանդես գալը բխում է արցախյան հակամարտության բովանդակությունից ու տրամաբանությունից և կնպաստի հիմնախնդրի կարգավորմանը», -հայտարարեց Դալլաքյանը:

Նրանք ունեն նաև առաջարկներ՝ ԱԺ-ում ձևավորել քննիչ հանձնաժողով, որը կուսումնասիրի 1991-2017 թթ ժամանակահատվածում ՀՀ նախագահների, ԱԺ նախագահների ու պատգամավորների, վարչապետների ու նախարարների ու այլ պաշտոնյաների գույքի ու ունեցվածքի իրական պատկերը, դրանց ծագման աղբյուրները:

Մյուս առաջարկությունը վերաբերում էր մեկ այլ քննիչ հանձնաժողովի ստեղծմանը, որը կուսումնասիրի նույն ժամանակահատվածում իրականացված մասնավորեցման, սեփականաշնորհման գործընթացի օրինականությունը:

Երրորդ քննիչ հանձնաժողովը, որ առաջարկում է ստեղծել «Երրորդ հանրապետության» նախագահը, պետք է ուսումնասիրի 1996-ի սեպտեմբերի 25-ին ԱԺ-ի դիմաց տեղի ունեցած իրադարձությունների, 1999 թվականի հոկտեմբերի 27-ին տեղի ունեցած ահաբեկչության, 2004 թվականի ապրիլի 11-12 գիշերը խաղաղ ցուցարարների նկատմամբ իրականացված վայրագությունների, 2008-ի մարտի 1-ի իրադարձությունների և սպանդի բացահայտման, 2016-ի հուլիսի 17-31-ը Երևանի ՊՊԾ գնդի գրավմանն առնչվող իրադարձությունների հետ կապված խնդիրները: