Ձեր վստահելի աղբյուրը

2016 թվականին ընդլայնվել է էլեկտրոնային գնումների համակարգը օգտագործող պատվիրատուների և էլեկտրոնային գնումների համակարգով իրականացվող գնումների շրջանակը: Այս մասին տարեվերջյան ամփոիչ ասուլիսում ասաց ՀՀ ֆինանսների նախարար Վարդան Արամյանը:

Նրա խոսքերով՝ էլեկտրոնային գնումների համակարգում ներառվել է հրատապության հիմքով պայմանավորված մեկ անձից գնումների կատարման ընթացակարգը, որի արդյունքում այլևս բացառվում է պատվիրատուի կողմից կոնկրետ անձին դիմելու և վերջինիս հետ պայմանագիր կնքելու հնարավորությունը:

«Գործողության արդյունքում գնման ընթացակագին մասնակցելու հնարավորություն են ստանում էլեկտրոնային գնումների համակարգում գրանցված բոլոր մասնակիցները և ընտրությունն իրականացվում է մրցակցային և թափանցիկ սկզբունքներով»,- ասաց նախարարը:

Վարդան Արամյանը նշեց նաև, որ որոշում է կայացվել էլեկտրոնային դարձնել նաև պետության հիսուն տոկոսից ավելի մասնակցությամբ առևտրային կազմակերպությունների կարիքների համար մրցակցային, ինչպես նաև հրատապության հիմքով պայմանավորված մեկ անձից գնումների կատարման ընթացակարգերը:

«Գնումների ընթացակարգերի թափանցիկության և հրապարակայնության աստիճանը բարձրացնելու նպատակով` ներդրվել է ինտերնետ միջավայրում գործող գնումներ հաշվետվողականության ծրագիրը, որը շահագրգիռ անձանց որոնման ճկուն համակարգի միջոցով հնարավորություն է ընձեռում ստանալ ամբողջական տեղեկատվություն գնման ընթացակարգերի մասին, այդ թվում իրականացնել վերլուծություններ: Բացի այդ, էլեկտրոնային գնումների համակարգում կատարվել է ծրագրային փոփոխություն, որի արդյունքում ինտերնետ միջավայրում ավտոմատ եղանակով հասանելի են դառնում մասնակիցների ներկայացրած հայտերը՝ հայտերը բացելուց հետո»,- ասաց Վարդան Արամյանը:

Ֆինանսների նախարարը կարևորեց ԱԺ-ի կողմից ընդունված «Գնումների մասին» նոր օրենքը, որի արդյունքում, ըստ նրա, կնվազեն գնման ձևերը, կպարզեցվեն ընթացակարգերի կազմակերպման ու դրանց մասնակցության հետ կապված պայմանները, կձևավորվի  բողոքարկման արտադատական գործունակ և անկախ համակարգ, կբարձրացվի գնման գործընթացների թափանցիկության և հրապարակայնության աստիճանը:

Վարդան Արամյանը նշեց նաև, որ մեխանիզմներ են նախատեսվում գնումների ոլորտում կոռուպցիոն հնարավոր դեպքերը կանխարգելելու համար:

Նախարարը տեղեկացրեց, որ ձեռնարկված միջոցառումների արդյունքում էականորեն նվազել է պետության կարիքների համար հրատապության հիմքով պայմանավորված մեկ անձից գնումների կատարման ծավալները, բարելավվել է գնման ընթացակարգերին մասնակցության միջին ցուցանիշը: Մասնավորապես` 2015թ. փաստացի կատարված մեկ անձից գնումների կատարման ծավալը կազմել է շուրջ 21,2 մլրդ. դրամ (18,6%), իսկ 2016թ` շուրջ 6,5 մլրդդրամ (7,1%) : 2015թ. մրցակցային ընթացակարգերի մասնակցության միջին ցուցանիշը կազմել է 3,4 , իսկ 2016թ. 9 ամսվա դրությամբ` 3.5 մասնակից:

Նշենք, որ տարեկան  արդյունքները կամփոփվեն 2017թ-ի առաջին եռամսյակում: