Համայնքների խոշորացման արդյունքում ձևավորվել է ռեսուրսների օպտիմալացման հնարավորություն
Տարածքային կառավարման և զարգացման նախարարության համար 2016թ-ը կարևոր տարի էր, քանի որ նախարարությունը որդեգրել է վարչատարածքային բարեփոխումների հսկայածավալ գործընթաց: Այս մասին այսօր տարեվերջյան ամփոփիչ ասուլիսում ասաց ՀՀ տարածքային կառավարման և զարգացման նախարար Դավիթ Լոքյանը:
Նրա խոսքերով՝ համայնքների խոշորացման ծրագրի արդյունքում ձևավորվել են 18 խոշորացված համայնքներ, որոնցում միավորվել են 140 համայնքներ: «Համայքների խոշորացումը շարունակական է լինելու: Կառավարության ծրագրով 2017 թ. նախատեսվում է ստեղծել ևս 20-ից ավելի խոշորացված համայնք, որոնց մեջ կմտնեն 250-ից ավելի համայնքներ: «Սա Հայաստանի ամբողջ վարչատարածքային բաժանումը փոխում է: 2018 թվականին մենք երկրում ունենալու ենք մոտավորապես 100-ին հասնող համայնքներ, որոնք կառավարվելու են շատ օպտիմալ, ունենալու են հսկայական մարդկային կապիտալ, ֆինանսական ռեսուրսներ և տնտեսական ծրագրերի մեծ փաթեթներ»,- ընդգծեց Դավիթ Լոքյանը:
Նախարարը նաև ասաց, որ համայնքների խոշորացման արդյունքում ձևավորվել է ռեսուրսների օպտիմալացման հնարավորություն:
Դավիթ Լոքանը նշեց, որ վարչատարածքային բարեփոխումների ծրագրի շրջանակներում կիրականացվեն ներդրումային ծրագրեր խոշորացվող 18 համայնքներում՝ ԱՄՆ ՄԶԳ և Շվեյցարական դաշնային զարգացման գործակալության ֆինանսավորմամբ: Մասնավարապես, ԱՄՆ ՄԶԳ ֆինանսավորմամբ երեք միավորված համայնքները՝ Դիլիջան, Տաթև և Թումանյան, շուտով կստանան լուրջ տեխնիկական վերազինում: Մեքենաների գնման գործընթացն արդեն սկսված է և առաջին տեխնիկան կժամանի մինչև նոր տարի:
Թումանյան համայքը կստանա 1 բազմաֆունկցիոնալ էքսկավատոր, մեկ բեռնատար մեքենա, մեկ ժամանակակից աղբատար, երեք միկրոավտոբուս: Համայնքի 6 բնակավայրերում կկառուցվեն 6 ավտոբուսային կանգառներ, իսկ Երևան տանող մայրուղու վրա՝ մեկ բազմաֆունկցիոնալ կանգառ-շուկա: Համայնքի համար կկառուցվի մեքենաների և տեխնիկայի կայանատեղ: Թումանյան համայնքի բոլոր գյուղերում այսուհետև կիրականացվի մշտական աղբահանություն:
Ըստ Դավիթ Լոքյանի՝ Տաթև համայնքի համար կգնվի մեկ բազմաֆունկցիոնալ էքսկավատոր, մեկ ավտոգրեյդեր, մեկ ինքնաթափ բեռնատար, երկու հացահատիկ հավաքող կոմբայն և մեկ աղբատար մեքենա, բոլոր գյուղերում կդրվեն աղբամաններ և կիրականացվի մշտական աղբահանություն:
Դիլիջան միավորված համայնքին դոնորների կողմից հատկացվել է շուրջ 1,7 մլն դոլար, որն ամբողջությամբ կուղղվի համայնքի խնդիրների լուծմանը: Մասնավորապես, կտրամադրվեն մեծ թվով մեքենաներ և տեխնիկա, ամբողջովին կփոխարինվեն Դիլիջան քաղաքի արտաքին լուսավորության հին սարքերը և երկու տարի հետո, ըստ նախարարի, կունենանք լիովին ժամանակակից լուսադիոդներով լուսավորված համայնք՝ Դիլիջան քաղաքով և 6 գյուղերով: Այս տարվա դեկտեմբեր ամսից Դիլիջանի, Թեղուտի, Հաղարծինի և Գոշի դպրոցներում իրենց աշխատանքն են սկսել ինժեներական լաբորատորիաները, որտեղ արդեն սովորում են 170 ապագա ծրագրավորողներ, եռաչափ նախագծող-ինժեներներ և ռոբոտային տեխնիկայի մասնագետներ:
Դավիթ Լոքյանն ասաց, որ 2017-2018 թվականներին համանման տեխնիկական վերազինում կիրականացվի ևս 15 միավորված համայնքներում, որի շնորհիվ կարձանագրեն համայնքային կարողությունների լուրջ աճ: «Համայնքները այսուհետև իրենց տրամադրության տակ ունենալով անհրաժեշտ գործիքակազմ, իրենք կլուծեն իրենց հարցերն ու կբավարարեն կոմունալ կարիքները: Սա շատ լուրջ առաջընթաց կլինի համայնքների ինքնուրույնության բարձրացման և կարողությունների հզորացման ճանապարհին»,- նշեց նա:
ՀՀ տարածքային կառավարման և զարգացման նախարարն անդրադարձավ Կառավարության կողմից հավանության արժանացած ՀՀ 2016-2025 թթ. տարածքային զարգացման ռազմավարությանը, որով նախատեսում է տարածքների մրցունակության բարձրացում և մարզերի միջև առկա անհամաչափությունների մեղմում։
Նրա խոսքերով՝ այդ նպատակով կմշակվի միջոցառումների ծրագիր, նաև յուրաքանչյուր մարզի համար տարածքային զարգացման ռազմավարություն։
Ըստ Դավիթ Լոքյանի՝ նախատեսվում է, որ 2025 թ-ին մարզերում միջին մասնագիտական և բարձրագույն կրթություն ունեցողների, ոչ գյուղատնտեսական ֆորմալ զբաղվածների և ակտիվ ձեռնարկությունների թվաքանակը կաճի առնվազն 10 տոկոսով` համեմատած 2016թ.-ի հետ:
Լրահոս
Տեսանյութեր
Օր չկա, որ մենք փողոցում չտեսնենք բողոքի դուրս եկած տարբեր խմբեր. Բագրատ Սրբազան
