Ձեր վստահելի աղբյուրը

Գեղարքունիքի մարզի սահմանամերձ համայքներից՝ Վարդենիսից ու Ճամբարակից, 22 երեխա  ՀՀ նախագահի նստավայրում մասնակցում էին Ամանորի և Սուրբ ծննդյան տոների կապակցությամբ երեխաների համար անցկացվող ամենամյա տոնական միջոցառմանը:  Գեղարքունիքի մարզպետարանի աշխատակազմի կրթության, մշակույթի, սպորտի վարչության պետ Գարիկ Բադալյանը Panorama.am-ի հետ զրույցում ասաց, որ բերել են այն երեխաներին, ովքեր սոցիալապես անապահով են և լավ են սովորում:

«Այսպես մենք ուզում ենք շահագրգռվածություն մտցնենք մյուս երեխաների շրջանում, որ կապ չունի սոցիալական վիճակը, կարևորը գիտելիքն է, լավ սովորողն արժևորվում է նաև Երևան գնալուց»,- նշեց նա:

Գ. Բադալյանի խոսքով՝ այս տարի իրենց մարզում աշակերտների թիվը 31-ով ավելացել է: «Սահմանամերձ շրջաններից չկա արտագաղթ, ժողովուրդն այդտեղ հիմնականում զբաղվում է հողագործությամբ, անասնապահությամբ, կարողանում են իրենց ապրուստի միջոցը վաստակել»,- ասաց Գեղարքունքի մարզպետարանի  աշխատակազմի կրթության, մշակույթի, սպորտի վարչության պետը:

Նշենք, որ Ամանորի և Սուրբ Ծննդյան տոների կապակցությամբ ՀՀ Նախագահի նստավայրում այսօր հյուրընկալվել էին Գեղարքունիքի, Վայոց ձորի, Արարատի, Տավուշի մարզերի սահմանամերձ մի շարք սահմանամերձ համայնքների, ինչպես նաև Հայաստանում ապաստան գտած սիրիահայ երեխաներ, սահմանափակ կարողություններով և Օլիմպիադաների («Կենգուրու», «Մեղու») մրցանակակիր երեխաներ:

Տավուշի մարզի Բերքաբեր գյուղի միջնակարգ դպրոցի տնօրեն Գայանե Խուդավերդյանը նախագահականում էր  իր 4 աշակերտի հետ:

«Բերքաբերը գտնվում է սահմանից 500 մետր հեռավորության վրա: Դպրոցը նախատեսված է 180 աշակերտի համար, այսօր սովորում է 47 աշակերտ: Արտահոսքի, կրակոցների  պատճառով երեխաների թվաքանակը նվազում է: Անցած տարվա համեմատությամբ, այս տարի աշակերտների թիվն ավելացել է տասով, բայց նվազելու միտում կա»,- ասաց դպրոցի տնօրենը:

Տիկին Գայանեի խոսքով՝  դպրոցն ունի ապաստարան, որը կիսակառույց վիճակում է: «Մեր երեխաները գիտեն ամեն ինչ՝ թե ինչպես պաշտպանվեն թշնամուց»,- հավելեց  նա: 

Դպրոցի 7-րդ դասարանում է սովորում Էմմա Դավթյանը: Նրա հետ նույն դասարանում սովորում է ևս 4 աշակերտ:

«Կրակոցների ժամանակ երեխաներով հավաքվում են մի տեղ, թաքնվում, մինչև վերջանան կրակոցները: Հաճախ են լինում: Վախենում ենք, բայց ուզում ենք դիմանալ: Դուրս ենք գալիս բակ խաղալու, երբ կրակոցներ չեն լինում»,- ասաց Էմման:

Նա խաղաղություն է մաղթում Հայաստանին ու հայ ժողովրդին:

Տավուշի մարզի  Արծվաբերդ գյուղի միջնակարգ դպրոցի 7-րդ դասարանցի Գոռի համար կրակոցներն արդեն սովորական են դարձել. «Արդեն չենք վախենում կրակոցներից: Մեկ-մեկ երկրաշարժից ենք վախենում»: Գոռը ցանկանում են դառնալ կենսաբանության ուսուցիչ՝ իրենց գյուղի դպրոցում աշխատելու համար:

Մեզ հետ զրույցում տարբեր դպրոցների 5-6-7-րդ դասարանների աշակերտների միակ ցանկությունն է՝ երկրում լինի խաղաղություն, բոլոր զինվորները վերադառնան իրենց տները:
Նախագահականի ավելի փոքր տարիքի հյուրերը Ձմեռ պապիկից ուզել են խաղալիքներ, նոթբուք, այփադ:

Ձմեռ պապ, Ձյունանուշ, տարբեր հեքիաթներից, մուլտֆիլմերից հերոսներ, երգ, պար, խաղեր…Երեխաները  Բաղրամյան 26-ից դուրս եկան նվերներով:

Նախագահի նստավայրում Ամանորի շեմին երեխաների համար կազմակերպվող ավանդական դարձած տոնական միջոցառումներին մասնակցում են 6-12 տարեկան շուրջ 1000 երեխա մայրաքաղաքից և մարզերից:  Միջոցառումները երեխաների համար կշարունակվեն նաև դեկտեմբերի 27-ին: