Ձեր վստահելի աղբյուրը

Հայաստանի Ազգային կինոկենտրոնը լուծարվելու է, անվանափոխվելու, վերակազմավորվելու: Կինոկենտրոնի բազայի վրա ստեղծվելու է նոր կառույց, որի տնօրենը չի լինելու Կինոկենտրոնի ներկայիս տնօրեն Գևորգ Գևորգյանը,-լրագրողների հետ հանդիպմանն ասաց մշակույթի նախարար Արմեն Ամիրյանը:

Նրա խոսքով՝  տնօրենը լինելու է տնտեսագետ, ֆինանսիստ:

«Ստեղծվելու է տնօրենների խորհուրդ, որի մեջ ընդգրկվելու են Հայաստանում կինոարտադրությամբ զբաղվող ընկերությունների ղեկավարները, ռոտացիոն համակարգով ղեկավարելու են այս կառույցը, իսկ ֆինանսիստ տնօրենը հետևելու է կառույցի ճշգրիտ աշխատանքին: Սա ընդամենը մտացածին մոդել է, վերջնական չէ»,- ասաց նախարարը:

Հարցին, թե արդյո՞ք դժգոհ էիք Գևորգ Գևորգյանի աշխատանքից, Ա.Ամիրյանը պատասխանեց. «Դժգոհ չեմ, ոչ էլ հարցն անարդյունավետության մեջ է: Յուրաքանչյուր կառույցին պետք է նայել ու գնահատական տալ իր ժամանակի մեջ: Իր ժամանակի մեջ Կինոկենտրոնը կարևորագույն դերակատարություն է ունեցել մեր մշակույթում, կինոարտադրության մեջ:  Եկել են նոր ժամանակներ, ամեն բանին նորովի պետք է նայել: Փորձում ենք փոխել՝ ստեղծելով նոր մեխանիզմ, անշուշտ, գնահատելով նաև  անցած ճանապարհը»:

Խոսելով «Հայֆիլմ» կինոստուդիայի մասին և պատասխանելով հարցին, թե արդյո՞ք այն մասնավորեցվելու է, Ա. Ամիրյանն ասաց, որ «Հայֆիլմ»-ը մասնավորացեման ծրագրի մեջ է, գտնվում է Գույքի կառավարման վարչությունում: Նա նշեց, որ այժմ մշակում են ներդրումային ծրագիր՝ հաշվարկելու, թե ինչ կարժենա գոնե նկարահանումների սրահի մասնաշենքի նորոգումը:

Մշակույթի նախարարի ամփոփիչ ասուլիսի վերջում ելույթ ունեցավ քանոնահարուհի Մերի Մուսինյանը: Նշենք, որ օրեր առաջ երևանցի 10–ամյա քանոնահարուհին ելույթ էր ունեցել ռուսական Առաջին ալիքի «Ամենից լավը» նախագծում՝ հիացնելով հաղորդավարին և հանդիսատեսին։ Նա կատարել էր  Ծովինար Հովհաննիսյանի «Էքսպրոմտ» ստեղծագործությունը։