Ձեր վստահելի աղբյուրը

2016 թվականին պետպատվերի շրջանակում արձանագրվել է հիվանդանոցային բուժօգնության  321 հազար 580  դեպք, որից մոտ 86,5 հազարը` 0-18 տարեկան երեխաներ։ Այս մասին այսօր  տարեվերջյան ամփոփիչ ասուլիսի ժամանակ ասաց ՀՀ առողջապահության նախարար Լևոն Ալթունյանը:

Նրա խոսքերով՝  ընթացիկ տարում շարունակվել է բնակչությանը պետության կողմից երաշխավորված անվճար բժշկական օգնության և սպասարկման շրջանակներում սրտի անհետաձգելի վիրահատությունների` ոչ դեղապատ ստենդի տեղադրման՝ կյանք փրկող ծրագիրը: Ինչպես նախորդ, այնպես էլ այս տարի սուր ինֆարկտից գրանցված մահերի թիվը շուրջ 500-ով նվազել է: Փրկվել է 1371 մարդու կյանք. պետպատվերի շրջանակում իրականացվել է 3.216 սրտի վիրահատություն, որից 167-ը` երեխաներ:

Անդրադառնալով  պետպատվերների ոլորտում առկա խնդիրներին՝ Լևոն Ալթունյանն ասաց՝  համաձայն է, որ այսօր որոշ բուժծառայությունների գներն անիրատեսական են` բավական ցածր են, և հենց այդ պատճառով մեծ կարևորություն են տալիս ֆինանսատնտեսական աշխատանքային խմբին, որը կոչված է վերագնահատելու բուժծառայությունների արժեքները և նոր գնանշումներ տալ:

Նախարարը նշեց, որ դա թույլ կտա իրենց հասկանալ՝ ի՞նչ գումար արժե Հայաստանում բնակչության առողջության արժեքը:

Խոսելով պետպատվերի՝ ժամանակից շուտ ավարտվելու մասին, Լևոն Ալթունյանն ասաց՝ համաձայն է, որ նման երևույթ կա, բայց հաջորդ տարվանից հիվանդանոցների գումարի բաշխման թափանցիկության էլեկտրոնային մեխանիզմ է ներդրվելու, որի արդյունքում քաղաքացիները կարող են  հետևել յուրաքանչյուր դրամին, յուրաքանչյուր հիվանդին, յուրաքանչյուր հիվանդանոցին հատկացված գումարներին: «Մենք համոզված ենք, որ այդ միջոցով հնարավոր չարաշահումների ցանկությունը կկանխենք»,- ընդգծեց առողջապահության նախարարը:

Լևոն Ալթունյանը նշեց, որ պետպատվերին հատկացվող գումարները սահմանափակ են և կարող է վերջանալ մեկ կամ երկու ամիս շուտ: «Ամբողջ աշխարհում է այդպես: Նույն Մեծ Բրիտանիայում պետպատվերով հիվանդները սպասում են իրենց վիրահատություններին երկու, երեք կամ ավելի տարիներ: Մեզ մոտ խոսքը գնում է երկու-երեք ամսի մասին: Այստեղ երևի թե խոսքը պետք է գնա բժշկի հմտության մասին, երբ որ բժիշկը պարտավոր է տարանջատել շտապ բուժօգնությունը և ապահովել քաղաքացուն դրանով և այն բուժօգնությունը, որը կարելի է հերթագրել և տրամադրել մեկ, երկու կամ երեք ամիս հետո»,- նշեց նա:

Առողջապահության նախարարը նաև ասաց, որ նախարարությանը հաջողվել է որոշակիորեն վեր հանել համակարգում առկա խնդիրները։ Այդ  նպատակով ստեղծվել է 4 աշխատանքային խումբ` Ծախսվող միջոցների ֆինանսական արդյունավետությունը գնահատող, Կառուցվածքային բարեփոխումների հանձնաժողով, Էլեկտրոնային առողջապահության համակարգի ներդրման աշխատանքային խումբ, Բժշկական գործելակարգերի թարգմանությունը, տեղայնացումը և ներդրումն ապահովող աշխատանքային խումբ:

«Ուսումնասիրությունների արդյունքները վկայում են, որ պետական պատվերով բժշկական օգնության ծրագրերն իրականացնելիս  բյուջեից հատկացվող միջոցները պետք է հնարավորինս արդյունավետ օգտագործվեն։ Առողջապահական համակարգի արդյունավետությունը և ծառայությունների որակը բարձրացնելու համար առաջիկա 2 տարում նախատեսվում է իրականացնել փուլային քայլեր, այդ թվում` օրենսդրական բարեփոխումներ, մատուցվող բժշկական ծառայությունների գների վերանայում»,- ասաց նախարարը՝ հավելելով, որ մատուցվող ծառայությունների որակի բարելավմանը մեծապես կնպաստի բյուջետային միջոցների փաստացի բաշխումից ծառայությունների գնման մոդելին անցումը։

ՀՀ առողջապահության փոխնախարար Սամվել Մարգարյանն էլ նշեց, որ ԱՆ ենթակա ՊՈԱԿ-ներում խնայողական ռեժիմի անցնելու հետևանքով նախարարությունը շուրջ 2 միլիարդ 700  միլիոն դրամի խնայողություն է կատարել: Ըստ նրա՝ ֆինանսական միջոցների արդյունավետ օգտագործման նպատակով հաջորդ տարի 12 դժվարամատչելի ծառայությունների գները 30%-ով կրճատվել են՝ համապատասխանեցվելով շուկայում առկա համադրելի գների մակարդակին:  Այդ ծառայությունները հասանելի կլինեն 30%-ով ավելի շահառուի։