Լավ է, որ «հաց բերող» Արթուր Սարգսյանը հիվանդանոցային պայմաններում է. Պաշտպան

Իրավունք 13:32 27/12/2016

«Սասնա ծռեր»-ի գործով կալանքի տակ գտնվող Արթուր Սարգսյանը, որը առավել հայտնի է «հաց բերող» անվանումով, այժմ գտնվում է «Դատապարտյալների հիվանդանոց» քրեակատարողական հիմնարկում բժիշկների հսկողության ներքո: Այդ մասին այսօր Գյումրու Տեխնոպարկում կայացած արտագնա ասուլիսում հայտարարեց Մարդու իրավունքների պաշտպան Արման Թաթոյանը:

Նա վստահեցրեց, որ Արթուր Սարգսյանի առողջական խնդիրների հետ կապված հարցը ՄԻՊ աշխատակազմի ուշադրության կենտրոնում է և իրենք այդ հարցով կապի մեջ են պատկան մարմինների հետ:

«Բազմիցս այցելել ենք Արթուր Սարգսյանին և այդ հարցով առողջապահության նախարարության հետ կապի մեջ ենք: Արթուր Սարգսյանին այժմ նրան տեղափոխել են «Դատապարտյալների հիվանդանոց»: Նա այժմ ֆիզիոթերապևտիկ բուժման ու շատ կարևոր բուժման կուրս պետք է անցնի: Լավ է, որ նա հիվանդանոցային պայմաններում է: Բայց միաժամանակ քննարկվում է, թե արդյոք պե՞տք է շարունակել բուժումը քաղաքացիական հիվանդանոցում», -հավելեց Թաթոյանը:

Ինչ վերաբերում է Արթուր Սարգսյանին առաջադրված մեղադրանքին, ապա Թաթոյանն ասաց, որ այդ հարցին ՄԻՊ գրասենյակը իրավասու չէ միջամտել, ինչպես նաև իրավասու չեն միջամտել դատաքննություններին:

Ավելի վաղ Սարգսյանի պաշտպանները հայտարարություն էին տարածել՝ տեղեկացնելով, որ Սարգսյանի մոտ առկա է զինծառայության ընթացքում ստացած Բեխտերևի հիվանդություն, ինչպես նաև նա տարել է ողնաշարի վիրահատություն՝ C1 և C2 մասնահատումով և պրոտեզավորմամբ: Ա. Սարգսյանի մոտ առկա է նաև որովայնային գծային ճողվածք՝ բավականին մեծ չափսերի: Հիշյալ պատճառներով Ա. Սարգսյանն ունի ֆիզիկական գործունեության սահմանափակումներ և ունի հատուկ պայմանների կարիք:

Հարակից հրապարակումներ`

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: