Ձեր վստահելի աղբյուրը

Այս տարի Հայաստանում արձանագրվել է կնասպանության 10 դեպք: Կանանց բռնության հարցերով զբաղվող տարբեր ՀԿ-ներ իրենց թեժ գծերին ստացել են ավելի քան 5000 զանգ, ոստիկանության և քննչական կոմիտեի տվյալներով՝ ստացել են մոտ 1500 զանգ, - լրագրողների հետ հանդիպմանն ասաց «Ընդդեմ կանանց նկատմամբ բռնության կոալիցիա»-ի համակարգող Զարուհի Հովհաննիսյանը:

Նրա նշեց, որ այս թվերը վկայում են, որ այս ոլորտում կան չլուծված հարցեր:

Իրավապաշտպանի խոսքով, խնդիրների լուծմանը կնպաստի «Կանանց իրավունքների պաշտպանությունը և ընտանեկան բռնության կանխարգելման» օրենքի ընդունումը:

«Կոալիցիան լուրջ աշխատանք է տարել այս ուղղությամբ, ներկայացրել է իր դիտարկումները: Դեռևս արձագանք չենք ստացել՝ արդյոք ներառվելու են մեր դիտարկումները նախագծում, թե ոչ»,- ասաց Զ.Հովհաննիսյանը՝ հավելելով, որ այժմ նախագիծն աշխատանքային փուլում է, հանված է շրջանառությունից:

«Սեռական բռնության ճգնաժամային կենտրոն»-ից Աննա Հովհաննիսյանն ասաց,  օրենքի նախագծի հետ կապված տարբեր կարծիքներ շրջանառվեցին, որ օրենքը վտանգավոր է, կարող է խափանել հայ ընտանիքի երջանկությունը:

«Օրենքի առկայությունն ընտանեկան բռնության դեպքում շատ կարևոր է, քանի որ կտրամադրի մեխանիզմներ, որոնցով հնարավոր կլինի պաշտպանել, փրկել մարդկանց կյանքերը,  որոնցով պետական կառույցերը, իրավապահ հակամարգը կկարողանան միջամտություն կատարել: Նույնիսկ իրավապահ համակարգից ենք շատ անգամ լսում, որ չունեն պաշտպանելու մեխանիզմ: Երբ գնում ես ոստիկանություն, ասում՝ պաշտպանել այս մարդուն, պատասխանում են, որ չկա օրենք, մեխանիզմ:  Օրենքի առկայություն դեպքում օրենքով կդիմես կառույցին  ու այդ ժամանակ չեն կարող ասել, որ չկա մեխանիզմ: Իսկ դա իրականում երկար գործընթաց է: Կարծրատիպ կոտրելու համար պետք են տարիներ, այստեղ պետության դերը մեծ է, կարևոր է գենդերային կրթությունը՝ սկսած մանկապարտեզից, դպրոցից»,- նշեց նա:

«Հասարակություն առանց բռնության» ՀԿ-ի գործադիր տնօրեն Լիդա Մինասյանն ասաց, որ օրենքի կիրառելիությունը, ինչպես ցանկացած այլ օրենք, դժվար կլինի, քանի որ ենթադրում է տարբեր օղակներում աշխատող պատասխանատուների վերապատրաստում, իրազեկվածության բարձրացում, ապաստարանի համար ֆինանսական միջոցներ:

Կանանց ռեսուրսային կենտրոնի ծրագրերի համակարգող Անահիտ Սիմոնյանն ասաց, որ միայն օրենքը բավարար չէ,  եթե չստեղծվի լիակատար միջավայր, որում իբրև կին, քաղաքացի, անհատ հնարավորություն կունենա օգտվելու, պաշտպանելու իր իրավունքները: