Ձեր վստահելի աղբյուրը

Պաշտպանության նախկին նախարար Սեյրան Օհանյանը, որ պաշտոնանկությունից հետո հանրության հետ շփվում է իր նորաստեղծ ֆեյսբուքյան էջով, այսօր դարձյալ գրառում է կատարել՝ պատասխանելով իր ներկայացմամբ, էլեկտրոնային փոստին ուղարկված և որոշ լրատվամիջոցների կողմից առավել հաճախ շրջանառվող հարցերին:

Մասնավորապես, պատասխանելով հարցին, թե արդյոք ինքը համարվո՞ւմ է իշխանական նախագիծ, Օհանյանը հայտարարել է. «Սպային վայել բարձր պատասխանատվությամբ վստահեցնում և պատասխանում եմ՝ ՈՉ»:

Իսկ մյուս հարցին, թե ուղղորդո՞ւմ են արդյոք իրեն ՀՀ առաջին, երկրորդ և գործող նախագահները, Օհանյանը պատասխանել է. «Ես՝ Սեյրան Օհանյանս, կրկնում եմ՝ քաղաքական հայտ ներկայացնելու որոշումը կայացրել եմ ինքնուրույն՝ ելնելով երկրում ստեղծված ներքաղաքական, տնտեսական, բարոյական ճգնաժամից:

Վստահեցնում եմ ինձ հետ թիմ կազմող հայրենանվեր մարդկանց, քաղաքական գործիչներին, մարտական և զինակից ընկերներին, ովքեր քաղաքական պայքարում կանգնելու են իմ կողքին, որ մենք լինելու ենք ժողովրդի հետ՝ հանուն ազգային գաղափարների, նրա անվտանգության և խաղաղ արարումի:

Կուզեի նշել, որ իմ գործունեության ընթացքում զբաղեցնելով կարևորագույն պաշտոններ պետության բոլոր նախագահների օրոք՝ ծառայել եմ ոչ թե անձերին, այլ Հայաստանի Հանրապետությանը, ուստի անընդունելի եմ համարում «պրիմիտիվ» շահարկումները»:

Այնուհետև իրեն հարցազրույցների համար դիմող լրագրողներին փոխանցել է հետևյալը. «Իմ ծրագրային գործունեության ընթացքում ունեմ ժամանակահատված՝ նախատեսված մամուլի ասուլիսների համար, որոնց մասին նախապես պատշաճ կծանուցվի: Խոստանում եմ մշտապես անկեղծ և հրապարակայնորեն պատասխանել ինձ ուղղված հարցերին»: