Ձեր վստահելի աղբյուրը

Հնգամյա Գոռին ծնողները հունվարի կեսերին կտեղափոխեն Գերմանիա: Բանակի կադրային սպա, կապիտան Վարուժան Եղոյանը Panorama.am-ին ասաց, որ որդու բուժման համար պակասող գումարը՝ 9 հազար եվրո անհայտ բարերարը փոխանցել է:

Երկու տարեկանից Գոռի մոտ սկսվել են էպիլեպսիկ ցնցումներ, դրանք ժամանակի ընթացքում հաճախացել են: Գլխուղեղի հետազոտությունների արդյունքում պարզվել է, որ կիստա կա: Հայաստանում բուժումներն արդյունք չեն տվել:

«Այսօր էլ երեխայի վիճակը ծանր է: Լուրջ փոփոխություններ չկան: Դրա համար ենք ուզում տանել Եվրոպա»,-ասաց հայրը:

Վարուժան Եղոյանի խոսքով,  բուժման մեկնելու համար անհրաժեշտ փաստաթղթերի մեծ մասը պատրաստ է, տոնական օրերից հետո կլուծվի նաև անձնագրերի հարցը:

«Հունվարի կեսերից հետո երեխային կտեղափոխենք Գերմանիա: Բժիշկների հետ նախնական պայմանավորվածություն ունենք»,-ասաց նա:

Տեղ հասնելուն պես երեխան կենթարկվի անհրաժեշտ հետազոտությունների, որոնց արդյունքում կկատարվի ճշգրիտ ախտորոշում, կսկսեն բուժումը:

«Հայաստանում իրականացրած հետազոտությունների արդյունքների ու իրենց պրակտիկայի հիման վրա գերմանացի բժիշկները մեզ ասել են, երեխայի բուժումը հնարավոր է կամ վիրահատական միջամտությամբ, կամ դեղորայքային բուժումով: Ախտորոշումից հետո արդեն հստակ կլինի ամեն ինչ»,-ասաց Վ. Եղոյանը:

Գոռն ընտանիքի միակ երեխան է: Հիվանդության պատճառով խոսել չի կարողանում: Ձմեռ պապին նամակ չի գրել, ցանկությունների մասին չի բարձրաձայնել:

«Մի քանի բառ է ասում: Բայց մենք էլ անում ենք հնարավորը, մեր ձեռքից եկածը, որ իր պատկերացումներն իրականություն դարձնենք: Իր համար ամենամեծ նվերը կլինի բուժումը»,-ասաց  հայրը:

Հիշեցնենք, որ Գերմանիա մեկնելու և բուժումը կազմակերպելու համար պետք էր 13.000 դոլար: Ընտանիքը կարողացել էր հայթայթել 3.000 դոլարի չափ գումար (այդ թվում՝ վաճառքի էր հանվել Վարուժանի ավտոմեքենան), մնացած 10.000 դոլարի խնդրանքով Գոռի ծնողները դիմել էին բարի մարդկանց օգնությանը: