Ձեր վստահելի աղբյուրը

Այս տարվա 11 ամիսներին Պետական եկամուտների կոմիտեի կողմից ապահովվել է 973.1 միլիարդ դրամ հարկային եկամուտ, նախորդ տարվա նույն ժամանակաշրջանի համեմատությամբ պետական բյուջեի հարկային եկամուտների աճը բացարձակ թվով կազմել է 3.9 միլիարդ դրամ կամ շուրջ 0.4  տոկոս: Լրագրողների հետ հանդիպմանը թվային տվյալները ներկայացրեց ՊԵԿ նախագահ Վարդան Հարությունյանը:

Նրա խոսքով՝ 739.1 միլիարդ դրամն ապահովվել է հարկային մարմինների, իսկ 234 միլիարդ դրամը՝ մաքսային մարմինների կողմից: Նախորդ տարվա նույն ժամանակաշրջանի համեմատ հարկային մարմինների կողմից ավելի է ապահովվել շուրջ  35,6 միլիարդ դրամ կամ աճի տեմը կազմել է 5 տոկոս, մինչդեռ մաքսային մարմինների կողմից շուրջ 31,7 միլիարդ դրամով պակաս է ապահովվել, նվազման տեմպը կազմել է 12 տոկոս: 

Ներքին տնտեսությունից վճարված հարկերի մեծությունը կազմել է 674,1 միլիարդ դրամ՝ նախորդ տարվա 660,1 միլիարդ դրամի համեմատությամբ: Այս ցուցանիշի մեջ ներառված չեն ԵԱՏՄ երկրներից ներկրված ապրանքների մասով հարկային մարմինների վճարած 64,9 միլիարդ դրամ հարկերը, այսինքն՝ առանց ԵԱՏՄ-ի աճը կազմել է 14 միլիարդ կամ 2,1 տոկոս:

Վ. Հարությունյանն ասաց, որ այս տարի եկամուտների ապահովման հետ կապված եղել են ռիսկեր, որոնք առավելապես դրսևորվել են սպառման ծավալների և արտաքին առևտրաշրջանառության, մասնավորապես ՝ ներմուծումների կրճատմամբ, ինչն ազդել է ոչ միայն սահմանին գանձվող, այլ նաև տնտեսության ներքին ապրանքաշրջանառությունից հաշվարկվող հարկերի վրա:  Դա արտահայտվել է հատկապես ՊԵԿ խոշոր հարկ վճարողների հարկային տեսչությունում հաշվառված հարկ վճարողների շահութաբերության ցուցանիշների անկմամբ:

Հաշվի առնելով, որ պետական բյուջեի հարկային եկամուտների ավելի քան 53,9 տոկոսն  ապահովվում է խոշոր հարկ վճարողների հարկային տեսչության կողմից, ՊԵԿ նախագահը մտահոգիչ է համարում այդ տնտեսվարողների մոտ իրացման շրջանառությունների ծավալների նվազման միտումները:

Մետաղական օգտակար հանածոների վերամշակման ոլորտում իրացման շրջանառության ծավալներ նվազել են 27.6 տոկոսով, էներգետիկայի ոլորտում՝ 3.9 տոկոսով, շինարարության ոլորտում՝ 21.7 տոկոս, կապի ոլորտում՝ 10.8 տոկոս, վառելիքի ներմուծում-իրացման ոլորտում՝ 8.4 տոկոս:

Վ. Հարությունյանը նշեց, որ խոշոր հարկ վճարողների հարկային տեսչությունում հաշվառված 521 հարկ վճարողներից դեկտեմբերի 1-ի դրությամբ ռիսկային են գնահատվել 296-ը: 

Նրանց մոտ միջին ամսական ստվերը գնահատվել է 3  միլիարդ 548 միլիոն 700 հազար դրամ, որը կազմում է հարկ վճարողների կողմից վճարված միջին ամսական հարկերի (առանց ԵԱՏՄ մուտքերի) 48.4 տոկոսը, իսկ ԽՀՎ ՀՏ-ում հաշվառված բոլոր հարկ վճարողների կողմից վճարված միջին ամսական հարկերի 11.1 տոկոսը:
Յուրաքանչյուր հարկ վճարողի ռիսկերի վերհանումը և ստվերի գնահատումն իրականացվել է անհատական վերլուծությունների միջոցով՝ 4 չափանիշներով՝ իրացման շրջանառությունների թերհայտարարագրում, իրացման գների թերհայտարարագրում, ծախսերի ուռճացում, ԱՎՈՒՄ-ի իրական մեծությունների թերհայտարարագրում:

Նախորդ տարվա համեմատ էականորեն՝ 51 տոկոսով,  նվազել է հարկային տեսչությունների կողմից իրականացված մասնակի ստուգումների և ուսումնասիրությունների քանակը, քանի որ խստացվել են դրանց իրականացման պահանջները: Փոխարենը, 168 տոկոսով աճել է մեկ ստուգման ակտին բաժին ընկնող գումարը: Նվազագույնի են հասել հատկապես ՓՄՁ դաշտում իրականացվող հսկողական աշխատանքներն ու անհարկի միջամտությունները: