Ձեր վստահելի աղբյուրը

«Սոցիալական ապահովության ոլորտում անհրաժեշտ են բարեփոխումներ պետական ծրագրերի ամբողջ սպեկտորով»:  Կառավարության այսօրվա նիստում հայտարարեց  վարչապետ Կարեն Կարապետյանը՝ անդրադառնալով սոցիալական ոլորտում կոռուպցիոն սխեմայի  բացահայտմանը:

Կառավարության ղեկավարն ընդգծեց, պետք է ստեղծենք համակարգեր կոռուպցիան բացառելու համար:

«Անհրաժեշտ է բարձրացնել ծրագրերի թե հասցեականությունը, թե դրանց արդյունավետությունը»,-ասաց նա:
Վարչապետի խոսքով,  պետությունը պետք է  ձեռք մեկնի կարիքավորին, նրան ոտքի կանգնելու նեցուկ լինի, սակայն չստեղծի չաշխատելու խթաններ:

«Սոցիալական պետական ծրագրերը պետք է այնպես մշակվեն, որ օգնությունը երբեք չբերի չարաշահումների ու կոռուպցիոն դրսևորումների, առաջին հերթին հասնի ամենակարիքավորներին, չաղավաղվի սոցիալական արդարությունը»,-ասաց կառավարության ղեկավարը:

Ավելի վաղ ԱԱԾ-ն հայտարարել էր, որ ՀՀ բժշկասոցիալական փորձաքննության գործակալությունում ձևավորվել և տևական ժամանակ գործել է կոռուպցիոն սխեմա, որի միջոցով պաշտոնատար անձինք ստացել են կաշառքներ և դրանք փոխանցել իրենց վերադասներին:

Կաշառք ստանալու կասկածանքով ձերբակալվել են, ապա կալանավորվել ՀՀ Աշխատանքի և սոցիալական հարցերի նախարարության աշխատակազմի ՀՀ բժշկասոցիալական փորձաքննության գործակալության պետ Արմեն Սողոյանը և նույն գործակալության վերափորձաքննության բաժնի պետ Ա.Պետրոսյանը: